Fátækum fjölgar í einu auðugasta landi heims

Noregur er óumdeilanlega eitt auðugasta land heimsins. Samt fer fátækum fjölgandi þar í landi.

Samkvæmt frétt um málið í Verdens Gang hefur fátækum börnum í Noregi fjölgað um að minnsta kosti 50.000 á undan förnum fimm árum og eru þau nú um 100.000 talsins.

Hér skal tekið fram að um börn er að ræða í fjölskyldum sem hafa tekjur undir tæpum 7 milljónum króna á ári, en sú upphæð er miðuð við hjón með tvö börn og fer eftir stöðlum Evrópusambandsins.

Verdens Gang ræðir við Tone Flotten talsmann Fafo stofnunarinnar sem rannsakar ýmis félagsleg mál í norsku samfélagi. Tone segir að aukinn fjöldi innflytjenda í Noregi skýri að mestu hve fátækum börnum í landinu fjölgar ört. Þetta eigi einkum við fjölskyldur þar sem fyrirvinnan á í erfiðleikum með að útvega sér vinnu.

Tone segir að nær helmingur fátækra barna í Noregi komi frá fjölskyldum sem glími við atvinnuleysi. Það jákvæða hinsvegar er að margar af þessum fátæku fjölskyldum eru snöggar við að koma sér úr þeirri stöðu.