Walker íhugar frekari kaup í Iceland-keðjunni

Malcolm Walker, stofnandi, forstjóri og meðeigandi bresku frystivörukeðjunnar Iceland, er sagður íhuga að kaupa einhverja hluti Baugs í versluninni. Breska dagblaðið The Independent segir Walker hafa hætt við kaupin fyrir um hálfum mánuði og hafi ekki verið boðað til frekari funda. Walker og Baugur gerðu í sumar tilboði í smásöluhluta Woolworths. Þegar fjölmiðlar greindu frá viðræðunum vísaði stjórn Woolworths því út af borðinu í ágúst. Ýjað hefur verið að því síðan þá að Baugur og Walker muni leggja fram annað tilboð. Einhverjar þreifingar munu hafa átt sér stað, að sögn blaðsins. Þá greinir The Independent frá milliríkjadeilu Breta og Íslendinga eftir að Landsbankinn og Kaupþing voru þjóðnýttir og vandræðum Baugs í Bretlandi í tengslum við það. Greint var frá því um helgina að bresk fyrirtæki Baugs á borð við House of Fraser, Iceland, Karen Millen og Hamleys hafi misst lánstraust hjá birgjum sínum að þeim sökum og gætu þau átt á hættu að fara í þrot verði ekkert að gert. Walker stofnaði Iceland-keðjuna árið 1970. Tuttugu þúsund manns starfar hjá fyrirtækinu í 660 verslunum.