Kosningagleði á bandarískum hlutabréfamarkaði

Kosningagleði smitaði út frá sér inn á hlutabréfamarkaði víða um heim í dag, ekki síst í Bandaríkjunum, og enduðu vísitölur víðast hvar í góðum plús.

Associated Press-fréttastofan hefur eftir heimildamönnum á verðbréfamarkaði vestanhafs að menn séu almennt sammála að botni sé náð á mörkuðum. Litlu skipti hvort John McCain eða Barack Obama vinni því báðir hafi þeir lagt áherslu á að koma í veg fyrir hrun á fjármálamörkuðum.

Einmitt af þessum sökum hafi fjárfestar lokað augunum fyrir fremur neikvæðum tölum, sem bendi til mikils samdráttar í bandarísku hagkerfi.

Hlutabréfavísitölur risu talsvert víða um heim, eins og áður sagði. Nikkei-vísitalan í Kauphöllinni í Japan skaust upp um 6,27 prósent, FTSE-vísitalan í Bretlandi fór upp úm 4,42 prósent, DAX-vísitalan í Þýskalandi hækkaði um fimm prósent og CAC-40 vísitalan í Frakklandi fór upp um 4,62 prósent.

Úrvalsvísitalan í Kauphöllinni hér lækkaði á sama tíma um 1,32 prósent.

Þá var sömuleiðis góð uppsveifla á bandarískum hlutabréfamörkuðum en Dow Jones-vísitalan fór upp um 3,28 prósent og Nasdaq-vísitalan hækkaði um 3,12 prósent.