Lindsay og Murphy langverst

Kvikmynd Lindsay Lohan, I Know Who Killed Me, hefur verið tilnefnd til níu Razzie-verðlauna en myndin Norbit með Eddie Murphy hlaut átta tilnefningar.

Verstu kvikmyndir og leikarar Hollywood fá Razzie-verðlaunin á hverju ári. Murphy, sem á síðasta ári var tilnefndur til Óskarsins fyrir hlutverk sitt í Dreamgirls, fékk sjálfur fimm Razzie-tilnefningar sem er það mesta sem einn leikari hefur fengið á einu ári.

Skýringin er sú að hann leikur þrjár persónur í myndinni. „Við ákváðum að hver og ein persóna væri svo léleg að hún ætti skilið sér tilnefningu,“ sagði John Wilson, stofnandi verðlaunanna, um frammistöðu Murphys. Wilson bætti við að Lohan hefði fengið flest atkvæði sem versta leikkonan síðan Sofia Coppola lék í The Godfather Part III.

„I Know Who Killed Me er glórulausasta myndin sem hefur komið út síðan Showgirls var sýnd, sem var kosin versta mynd tíunda áratugarins af Razzie.“

Á meðal fleiri leikara sem voru tilnefndir til Razzie voru Nicolas Cage fyrir frammistöðu sína í Ghost Rider, Jim Carrey fyrir The Number 23 og Jessica Alba fyrir myndirnar Awake, Fantastic Four: Rise of the Silver Surfer og Good Luck Chuck.