Vodafone kaupir indverskt farsímafélag

Breski farsímarisinn Vodafone hefur keypt 67 prósenta hlut asíska fjárfestingafélagsins Hutchison Whampoa í Hutchison Essar, fjórða stærsta farsímafélagi Indlands. Kaupverð nemur 11,1 milljarði bandaríkjadala, jafnvirði 753,8 milljörðum íslenskra króna.

Vodafone hefur síðan fyrir áramót att kappi við fjölda alþjóðlegra farsímafélaga um hlutinn, þar á meðal indverska eignarhaldsfélagið Essar, sem fer með minnihluta í félaginu. Með kaupum þykir Vodafone hafa tryggt sér forskot á indverska farsímamarkaðnum, sem gert er ráð fyrir að muni vaxa gríðarlega á næstu árum. Til merkis um það fjölgar nýjum viðskiptavinum farsímafélaga í landinu um 6,5 milljónir í hverjum mánuði.

Breskir fjölmiðlar, þar á meðal breska ríkisútvarpið, segja kaupin marka ákveðna þróun hjá Vodafone, sem hefur líkt og önnur farsímafélög í Evrópu horfir í auknum mæli til nýmarkaða í Afríku og Asíu í kjölfar ákveðinnar mettunar á evrópska og bandaríska farsímamarkaðnum. Þá hafa hluthafar Vodafone þrýst á Arun Sarin, forstjóra Vodafone, að hann leiti leiða til að færa fyrirtækið inn á nýjar brautir. Kaupin á meirihlutaeign Hutchison er skref í þá átt.