Rassskellingum sýndur áhugi

Eva Hauksdóttir í Nornabúðinni birti smáauglýsingu í Fréttablaðinu á föstudaginn sem vakti mikla athygli. Þar auglýsti hún eftir stæðilegum mönnum til að rassskella samráðsmenn olíufélaganna og gátu áhugasamir sent henni póst á eva@nornabudin.is. Eva hafði fengið mikil viðbrögð við auglýsingunni þegar Fréttablaðið náði tali af henni í veðurblíðunni en viðurkenndi að fáum hefði verið alvara.

 „Einn sýndi þessu reyndar mikinn áhuga en hann hafði í huga líkamsmeiðingar og það er ekki það sem ég hef áhuga á,“ útskýrir Eva og segir flenginguna eiga að vera bæði gamaldags og táknræna; hún eigi að sýna að þarna hafi menn gengið of langt og þeir skuli skammast sín. „Dómskerfið ræður í það minnsta ekki við þetta,“ bætir hún við.

Eva lætur þess þó getið að fjölmargir hafi lýst yfir áhuga á að styrkja verkefnið fjárhagslega, enda sé ákaflega líklegt að svona verkefni útheimti einhver útgjöld. „Það er spurning hvort ekki eigi að stofna hreinlega fyrir­tækið Þjóðþrifaráð í kringum þessar athafnir,“ útskýrir Eva, sem telur að ef til vill eigi aðrar stofnanir von á álíka flengingum á næstunni. „Ætli bankarnir séu ekki bara næstir,“ segir hún.