Olíuverð hækkar á ný

Heimsmarkaðsverð á hráolíu hækkaði á ný á helstu fjármálamörkuðum í dag og fór yfir 64 bandaríkjadali á tunnu. Þetta er þriðji dagurinn í röð sem slíkt gerist eftir talsverðar lækkanir í síðustu viku. Ástæðan fyrir hækkuninni eru tafir á olíuframleiðslu við nýja olíuvinnslustöð við Mexíkóflóa. 

Fyrirhugað var að olíuvinnsla hjá BP við Thunder Horse olíuvinnslustöðina við Mexíkóflóa, stærsta svæðinu í flóanum, hæfist fyrir ári. Vegna fellibylja á svæðinu undir lok síðasta árs og skemmda á tækjabúnaði frestuðust framkvæmdir. Olíuvinnsla hefur vegna þessa ekki náð markmiðum félagsins.

Verð á hráolíu, sem afhent verður í næsta mánuði, hækkaði um 25 sent á markaði í New York í Bandaríkjunum og fór í 64,05 dali á tunnu. Verðið fór niður í 62,03 dali á tunnu til skamms tíma á föstudag og hafði það ekki verið lægra í hálft ár. Þá hækkaði verð á Norðursjávarolíu um 33 sent á markaði í Lundúnum í Bretlandi og fór í 64,38 dali á tunnu.