Jól

Jólin eru drengjakórar

Marta Nordal leikkona er ekki hrifin af jólafárinu sem grípur um sig í þjóðfélaginu í desembermánuði. "Þegar ég var lítil var ég jólabarn vegna gjafanna en núna finnst mér jólin vera hálfgerð vitleysa. Það verður allt svo ofhlaðið einhvern veginn, jólaskrautið er svo mikið úti um allan bæ, aldrei hægt að kveikja á útvarpi án þess að ofurhressileg jólalög hellist yfir mann og allir hringsnúast í leit að einhverjum jólagjöfum handa fólki sem á allt. Það sem kveikir í mér jólaandann er ofsalega einfalt. Jólin fyrir mér eru rjúpa og drengjakórar sem syngja ensk jólalög. Svo er hefð fyrir því í fjölskyldunni að lesa jólaguðspjallið saman á aðfangadag. Nú er búið að taka af mér það litla sem mér finnst jólalegt, rjúpuna, og þá er ekki mikið eftir" segir Marta. "Mér finnst markaðshugsjónin komin út í vitleysu og heilagleikinn og friðurinn, sem ætti að vera það sem er eftirsóknarverðast við jólin, á hröðu undanhaldi. Ef þetta á að snúast um frelsarann þá situr hann örugglega þarna uppi og skilur ekkert í þessu." Marta gæti vel hugsað sér að fara í messu á jólanótt, hlusta á fallega tónlist og finna þar það sem raunverulega skiptir máli á jólunum. "Ég gæti hugsað mér að sitja í fallegri kirkju og hlusta á Jólaóratoríuna. Þar er jólastemmingin fyrir mér."


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



Velkomin á Vísi. Þessi vefur notar vafrakökur. Sjá nánar.