Atvinnulíf

Að kljást við fúla og leiðinlega vinnufélaga

Rakel Sveinsdóttir skrifar
Það sem við eigum alls ekki að gera ef okkur finnst einhver vinnufélagi alltaf vera fúll, pirraður, leiðinleg(ur) í tilsvörum og svo framvegis er að detta í baktal á vinnustaðnum eða fara að svara í sömu mynd. 
Það sem við eigum alls ekki að gera ef okkur finnst einhver vinnufélagi alltaf vera fúll, pirraður, leiðinleg(ur) í tilsvörum og svo framvegis er að detta í baktal á vinnustaðnum eða fara að svara í sömu mynd.  Vísir/Getty

Við erum að öllu jöfnu öll að gera okkar besta. Mætum til vinnu, brettum upp ermar og erum kát.

Ekki síst nú, þegar öll umræða hefur aukist um hversu mikilvægt það er að okkur líði vel í vinnunni, séum að hvílast, séum meðvituð og svo framvegis.

En síðan er það fúli vinnufélaginn.

Já, það getur verið hægara sagt en gert að trekkja okkur upp í jákvæða orku og brosmildi þegar einhver sem við vinnum með alla daga er oft í fúlu skapi.

Pirringur, fýla, þögn, hundleiðinleg tilsvör...

Númer eitt, tvö og þrjú er að muna að þessar skapsveiflur hjá viðkomandi hafa ekkert með okkur að gera, en allt með það hvernig viðkomandi er að líða eða á hvaða stað hann/hún er í sínu lífi.

Hér eru nokkur ráð sem geta hjálpað.

Haltu ró þinni (og í jákvæðnina)

Þetta hljómar auðvelt en getur tekið á. Því þegar að við stuðumst eða pirrumst yfir hegðun og fýlu viðkomandi aðila, getur góða skapið okkar og jákvæðnin hreinlega horfið eins og dögg fyrir sólu og áður en við vitum af, er okkur farið að hitna í kinnum af pirring.

Sem er akkúrat það sem við viljum ekki.

Þannig að áskorun númer eitt er að halda ró okkar, svara aldrei í sömu mynd og umfram allt: Ekki falla í þá gryfju að taka þátt í baktali!

Oft er það meira að segja svo að góða skapið okkar og brosið getur komist langt með að sporna við fúlindum viðkomandi og því þeim mun mikilvægara að halda okkar ró og halda í okkar jákvæðu orku. 

Að spyrja og sýna samkennd

Stundum höfum við reyndar þekkt viðkomandi svo lengi í vinnu að við nemum það að fýlan, neikvæðnin, pirringurinn og svo framvegis er í raun ekki að endurspegla þann einstakling sem við höfum þekkt í gegnum árin. 

Þótt fýlan hafi verið áberandi síðustu vikur eða mánuði.

Þegar svo er, má alveg velta því fyrir sér hvort við ættum að sýna samkennd og stuðning með því að spyrja umræddan aðila um hans/hennar líðan, hvernig gangi, hvort eitthvað sé að og hvort það sé eitthvað sem við getum gert til að hjálpa.

Því öll getum við farið í gegnum erfið tímabil og það gæti átt við um þennan vinnufélaga þinn.

Að útskýra þína líðan

Ef þú opnar samtal við viðkomandi, til dæmis til að spyrja hvort það sé eitthvað að, er líka í lagi að útskýra hvernig neikvæða hegðunin, skapsveiflurnar eða fýlan er að hafa áhrif á þig.

Því stundum er það þannig að viðkomandi er ekkert að átta sig á þeim áhrifum sem neikvæðu skapsveiflurnar eru að hafa á fólkið í kring. 

Ef allt annað þrýtur…

Ef þú metur það hins vegar svo að fýlan og pirringurinn er að hafa neikvæð áhrif á þig og alla aðra í teyminu dögum saman, jafnvel lengur, gæti verið réttast að leita til mannauðssviðs eða yfirmanns. Því það á enginn að hafa viðvarandi neikvæð áhrif á vinnufélaga hreinlega með því að vera fúlir og leiðinlegir.


Tengdar fréttir

Óheiðarlega fólkið í vinnunni og þrjú góð ráð

Að vita hverjir eru traustsins verðir og hverjir ekki, er ekkert alltaf svo sýnilegt á vinnustöðum. Sérstaklega ef að við þekkjum lítið til, erum til dæmis á nýjum vinnustað eða í aukavinnu með námi eða annarri vinnu.

Þegar snobbaðir vinnufélagar fara í taugarnar á þér

Það er með ólíkindum hvernig hugurinn getur fengið okkur til að eyða orku að óþörfu. Mjög oft þá að láta eitthvað í fari annarra fara óskaplega í taugarnar á okkur. Til dæmis þeirra snobb.

Góð ráð fyrir lata starfsmenn

Við eigum okkur öll okkar daga. Já, svona leti-daga. Mætum til vinnu og erum hálf löt allan daginn. Komum litlu í verk. Eigum erfitt með að einbeita okkur. Erum þreytt. Eða með hugann annars staðar. Sem betur fer, eru leti-dagarnir ekki viðvarandi. Daginn eftir mætum við til vinnu á ný, galvösk og brettum upp ermar.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.