Þetta rímar ágætlega við lífið sem er í ánni á nokkrum stöðum og það er reglulega gaman að sjá töluvert af laxi liggja á nokkrum veiðistöðum. Síðasta sólarhring gengu 90 laxar í gegnum teljarann og það verður bara að teljast nokkuð gott.  Þegar síðan hjá Riverwatcher er skoðuð er hægt að sjá stöðuna í ánum og þær ár á íslandi sem hafa teljara eru til dæmis Korpa en þar hafa 285 laxar gengið í gegnum teljarann, 377 í gegnum teljarann við Glanna í Norðurá, 159 í Laxá í Leirársveit og 44 í Vesturdalsá. Þetta er ekki allt upptalið en það er ansi magnað að sjá muninn á drottningunni Norðurá og Elliðaánum.

Norðurá hefur verið róleg í sumar miðað við það sem myndi teljast normið en síðustu uppfærðu veiðitlur sem eru að vísu orðnar vikugamlar gáfu upp 330 laxa. Hún er komin yfir 400 samkvæmt okkar heimildum við bakkann en það er engu að síður mun minna en það sem mætti kalla meðalár.