Bílar

Volkswagen hefur byggingu þriðju MEB verksmiðjunnar í Kína

Kristinn Ásgeir Gylfason skrifar
ID.3
ID.3

Volkswagen hefur tilkynnt að bygging glænýrrar rafbílaverksmiðu í Kína sé að hefjast. Verksmiðjan verður samvinna Volkswagen og Anhui þar sem Volkswagen fer með 75% hlut. Verksmiðjan á að skila 350.000 rafbílum á ári, þegar hún verður kominn á fullt.

Verksmiðjan verður sú þriðja sem er ætlað að framleiða MEB-bíla í Kína. MEB-bílar eru bílar sem byggja á hinum vinsæla MEB grunni. Meðal MEB-bíla eru Volkswagen ID.3, ID.4 og ID.6 ásamt Skoda Enyaq og Audi Q4 í ýmsum útfærslum.

Volkswagen gerir ráð fyrir að verksmiðjur félagsins í Kína muni skila um 1,5 milljón nýorkubílum á ári frá árinu 2025. Þær þrjár verksmiðjur sem þegar eru til staðar eða á teikniborðinu munu geta af sér 950.000 bílum á ári samtals. Það er því ljóst að enn frekari fjárfestinga er þörf.

„Volkswagen Anhui verður nafli alheimsins í rafbílum og þróun þeirra og hornsteinn í markmiði Volkswagen að draga úr kolefnislosun. Þar sem Kína er stærsti einstaki nýorkubíla markaðurinn, þá þurfum við að styrkja stöðu okkar á svæðinu og Volkswagen Anhui er stór hluti af því. Verksmiðjan verður knúin áfram með grænni orku frá fyrsta degi og með því erum við að sýna hversu alvara okkur er með því að draga úr kolefnislosun á fleiri stöðum en bara í bílunum sem við framleiðum,“ sagði Dr. Stephan Wöllenstein, framkvæmdastjóri Volkswagen í Kína.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×