Veiðisvæðið Alviðra í Soginu átti nokkra góða daga í sumar og þá var veiðin þar betri en hún hefur verið í mörg ár.
Þetta nafntogaða svæði var eitt sinn eitt af þeim betri í Soginu en hefur síðustu 10-15 árin verið frekar lélegt það eru þess vegna góðar fréttir að heyra af þeim nokkru góðu dögum sem voru þar í sumar. Alviðra var lengi hjá Stangaveiðifélagi Reykjavíkur en nú stefnir líklega í að svæðið fari annað. Nú hefur hins vegar auglýst útboð í svæðið og það verður fróðlegt að sjá hverjir koma til með að bjóða í það. Hér fyrir neðan er tilkynning af vefnum Veiða.is um umrætt útboð.
Eigendur Alviðru undir Ingólfsfjalli og Öndverðarness II í Grímsnes- og Grafningshreppi, eru handhafar réttar til stangveiði í Soginu.
Veiðisvæðið sem um ræðir er vesturbakki Sogs í landi Alviðru og austurbakki neðan brúr við Þrastarlund. Fjöldi stanga er tvær. Sogið er sögufræg veiðiá. Silungsveiðitíminn er frá 1. apríl til 31. maí og laxveiðitíminn frá 24. júní til 23. september.
Óskað er eftir tilboðum í leigu á framangreindum réttindum til stangveiðar frá og með árinu 2021, og í allt að 5 ár, sem og afnotum af vel útbúnu 60 fm. veiðihúsi sem staðsett er að Alviðru.
