Atvinnulíf

Litla húsið úr þrívíddarprentaranum

Rakel Sveinsdóttir skrifar
Hús byggt með þrívíddarprentara.
Hús byggt með þrívíddarprentara.

Það hljómar kannski ótrúlega en á dögunum var heilt hús byggt með sex metra háum þrívíddarprentara í Kaliforníu í Bandaríkjunum. Það tók þrívíddarprentarann um sólahring að prenta það sem til þurfti en um 80% af húsinu er búið til með prentaranum. Einstaka hlutir bættust síðan við frá öðrum birgjum. Það voru gluggar, pípulagnir, einstaka raflagnir og klæðningin á baðherbergi hússins.

Kostnaður húsa sem reist eru með þessum hætti er sagður tæplega helmingi lægri en kostnaður ætti að vera fyrir sambærilegt hús í Bandaríkjunum. 

Framleiðandi hússins er nýsköpunarfyrirtækið Mighty Buildings sem er um tveggja ára gamalt. Það hefur sérhæft sig í  þróun þrívíddarprentara til að reisa hús í mismunandi stærðum. Minnstu húsin eru stúdeó íbúðir en stærstu húsin eru með þremur svefnherbergjum og tveimur baðherbergjum. 

Verð húsanna eru frá 16 – 30 milljónir íslenskra króna og innifelur verð öll leyfisgjöld, flutning á lóð og fleira. Þá stefnir fyrirtækið á að geta þrívíddarprentað ýmsar einingar og hluti fyrir fjölbýlishús.

Í viðtali við FastCompany segir framkvæmdastjóri og einn stofnenda Mighty Buildings að galdurinn við þrívíddarhúsin felist í að búa til prentara sem ráði við helstu liði húsbygginga, s.s. veggi, gólf eða loft. Þegar þeirri tækni er náð er eftirleikurinn auðveldur. 

Í Kaliforníu sárvantar smiði og byggingaverktaka og því horfa menn nú til þess að þrívíddarhús muni mæta þeirri manneklu. Húsnæðisþörfin í fylkingu er mikil því samkvæmt skýrslu McKinsey frá árinu 2016 þarf fylkið að byggja 3,5 milljónir húsa fyrir árið 2025 sem sagt er langt frá raunveruleikanum miðað við síðustu ár. 

Mighty Buildings er ekki eina fyrirtækið í heiminum sem þegar hefur reist hús með tilkomu þrívíddarprentara. Í Mexíkó stendur til dæmis yfir verkefni þar sem ætlunin er að reisa heilt hverfi með þrívíddarprentuðum húsum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×