Atvinnulíf

„Stjórnandi sem er undirlagður af streitu er ekki að sýna sínar bestu hliðar“

Rakel Sveinsdóttir skrifar
Hugrún Linda Guðmundsdóttir
Hugrún Linda Guðmundsdóttir Vísir/Vilhelm

Hugrún Linda Guðmundsdóttir segir mikilvægt að stjórnendur hugi að sjálfum sér þegar álag er mikið og það eigi ekki síst við um nú þegar aðstæður í atvinnulífinu eru krefjandi og óvissa ríkir víða enn. Þá er mikilvægt að treysta starfsfólkinu sínu og reyna að skapa jákvætt andrúmsloft á vinnustöðum því það eitt og sér hjálpar teymum oft að komast í gegnum erfiða tíma. 

Hugrún er félagsráðgjafi, markþjálfi og núvitundarkennari hjá Heillandi hugur, Fræðslu og heilsusetur. Hún segir að á meðan krísuástand varir sé mikilvægt að stjórnendur haldi fólkinu sínu upplýstu eftir bestu getu. Þannig geti góð upplýsingamiðlun ein og sér komið í veg fyrir óþarfa óöryggi og óvissu á meðal starfsmanna. Þetta eigi vel við nú þegar atvinnulífið er að hefja sína viðspyrnu fyrir alvöru til að koma hjólum hagkerfisins aftur af stað.

Hugrún segir þó að þótt stjórnendum sé mikið í mun að starfsfólki þeirra líði sem best, megi þeir ekki gleyma sjálfum sér.

„Stjórnendur eru bara fólk eins og allir hinir. Ég myndi því ráðleggja þeim að byrja á að hlúa að sjálfum sér. Stjórnendur verða að passa streitueinkennin sín og halda andlegu jafnvægi í gegnum óvissu og erfiðleika. 

Stjórnandi sem er undirlagður af streitu er ekki að sýna sínar bestu hliðar og er ekki gott fordæmi fyrir hina,“ 

segir Hugrún og bætir við „Yfirvegaður og rólegur stjórnandi tekur betri ákvarðanir, er meira til staðar fyrir fólkið sitt, hefur betri yfirsýn og, einbeitingu. Alveg sama hvað gengur á í fyrirtækinu þá þurfa allir að halda athygli til að geta leyst verkefnin sem koma upp.“

En hvað myndir þú ráðleggja stjórnendum sem vilja efla sjálfstraust starfsfólks og teyma?

„Stjórnandi þarf að treysta fólkinu sínu, leyfa þeim að koma með hugmyndir og lausnir, láta fólk finna að það skiptir máli. Að fólk fái verkefni við hæfi þar sem það getur nýtt styrkleikana sína og getu á sem bestan hátt. 

Félagslega umhverfið þarf að vera öruggt þannig að það sé pláss fyrir fólk sem líður kannski ekki alltaf vel, að það sé skilningur til staðar og hlustun á milli starfsmanna, samstaða og sanngirni. 

Stjórnandi getur haft áhrif á það hvernig fólk upplifir starfið sitt, en það skiptir miklu máli að fólk upplifi að starfið sem það sinnir sé mikilvægt og skipti máli í stærra samhengi, að það hafi tilgang. Þetta gerir stjórnandi með því að veita því athygli sem fólk gerir ásamt jákvæðri endurgjöf, hlustun og hlýju. 

Svo er alltaf gott að skapa jákvæðar tilfinningar, hafa gleðina og húmorinn upp við. Brjóta upp dagana og gera eitthvað skemmtilegt saman,“ 

segir Hugrún.

Að sögn Hugrúnar er líka mikilvægt að stjórnandi sem sjálfu glímir við mikið álag og streitu þori að biðja um aðstoð, hvort sem sú aðstoð er innanhús eða frá utanaðkomandi. Það geti hjálpað stjórnandanum að ná yfirsýn og skipuleggja næstu vikur og mánuði.

„Oft er hægt að útdeila verkefnum, forgangsraða betur og skipuleggja það sem hægt er að skipuleggja. Mikilvægast fyrir alla er að halda heilsu, passa upp andlegt og líkamlegt jafnvægi sem og jafnvægi milli vinnu og einkalífs,“ segir Hugrún.


Tengdar fréttir

Þurfum súrefnisgrímuna til að sinna verkefnunum framundan

Óvissan við að það sem framundan getur haft áhrif á sjálfsöryggi og líðan sem mikilvægt er að efla þannig að við séum betur í stakk búin til að takast á við áskoranirnar framundan í vinnu og einkalífi. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.