Breytingar á veiðireglum í Rangánum

Það hafa verið nokkrar breytingar á veiðireglum í ám frá því í fyrra og þar á meðal var reglum breytt í Blöndu en núna hefur verið gerð breyting í Rangánum líka.

Rangárnar eru án efa eitt vinsælasta veiðisvæði landsins og þær breytingar sem hafa verið kynntar falla mönnum vel í geð, þá sér í lagi breytt fyrirkomulag á skiptingum í Eystri Rangá. Veiðitíma hefur líttillega verið breytt og hann styttur í Eystri ánni. Hér fyrir neðan eru þær breytingar sem búið er að gera og eru þær teknar af síðu Lax-Á með góðfúslegu leyfi.

Breyting á Veiðireglum í Rangánum.

Eins og menn hafa líklegast frétt verður fyrirkomulag veiða nokkuð breytt í Rangánum í sumar og þó meiri breytingar í Eystri ánni. Í Ytri eru breytingarnar léttar og laggóðar – veitt verður núna um hásumarið frá kl 7-13 og 15-21. Hætt verður að veiða til kl 22:00 á okkar tíma.



Í Eystri eru breytingarnar öllu meiri og verða þær tíundaðar hér að neðan.



Veiðitími: Veitt verður frá 8-13 og 15-20 frá 01.07 -03.09. Eins og menn vita er áin köld og fáir sem hafa viljað rífa sig upp til að byrja kl 7 og því byrjum við klukkutíma seinna. Á kvöldin hættum við fyrr, borðum fyrr og sofnum fyrr eða verðum lengur í pottinum.



Holl: Áin verður veidd í þriggja daga hollum með örfáum undantekningum.



Agn: Nú verður í fyrsta skipti síðan elstu menn muna fluga eingöngu leyfð sem agn frá 01.07 – 20.08.  Eftir 20.08 er allt löglegt agn leyfilegt. Þetta mun að okkar mati gera það að verkum að veiði helst jafnari fram á haustið.



Kvóti: Kvóti verður ríflegur eða fjórir smálaxar á vakt. Laxi 70 cm verður að sleppa í þar til gerðar kistur eða aftur í ána.



Svæði: Öll svæði árinnar verða á okkar forræði á tímabilinu 01.07 -03.09. Þetta er breyting frá því sem var þegar veiðifélagið var alltaf með fjórar stangir og tvö svæði.



Skiptingar: Við höfum ákveðið að breyta skiptingum til að gera þær sanngjarnari. Skiptingar verða sem hér segir: 9/6/3/8/5/2/7/4/1/9/6/3 – Alltaf er hoppað yfir tvö svæði.