Iron Knight gegn Volvo S60 Polestar

Hvort skildi vera betra að hafa 2.400 hestöfl til taks í trukki eða 400 hestöfl í Volvo S60 Polestar bíl þegar mætt er á keppnisbraut? Það kemur í ljós í þessu myndskeiði, en þar sést hvar hinn magnaði Iron Knight trukkur, sem sérhannaður var hjá Volvo til að slá öll met á meðal trukka, mætir fólksbíl með sama merki á grillinu.

Báðir eru þeir skráðir fyrir tímanum 4,6 sekúndur í 100 km hraða, en í kvartmíluspyrnu er bara spurningin hver nær betri tengingu við malbikið í rigningunni sem var þegar þeir áttust við. Bílarnir voru einnig látnir keppa á akstursbraut og þar ætti fólksbíllinn að hafa vinniginn með lægri þyngdarpunkt og hæfari fjöðrun til slíks aksturs.

Það kemur þó allt í ljós í myndskeiðinu hér að ofan. Það er fáheyrt fyrir trukk að vera aðeins 4,6 sekúndur í hundraðið, en ef til vill enn fáheyrðara að vera aðeins 21,29 sekúndur að klára eins kílómetra vegalengd, en til þess eru þó 2.400 hestöfl til taks og 4.425 pund/fet af togi.