VW Golf GTI Clubsport S bætti enn metið á Nürburgring

Það dugði Volkswagen ekki að eiga hraðametið á Nürburgring brautinni fyrir fjöldaframleidda og framhjóladrifna fólksbíla. Volkswagen mætti aftur með Golf GTI Clubsport S bíl sinn á brautina 6 mánuðum síðar og bætti metið enn um tvær sekúndur. Fyrri mettíminn var 7:49,21 mínútur en nýja metið 7:47,19 mínútur.

Til samanburðar þá á mun öflugri BMW M2 tímann 7:58 á brautinni og Honda Civic Type R á 7:50,63 mínútur. Þegar seinni metsláttur Volkswagen fór fram þá var 8 stiga hiti og var það kjörið hitastig til að halda vél Golf GTI Clubsport bílsins nægjanlega kældri, sem og dekkjunum í sínu besta standi.

VW Golf GTI Clubsport S er 310 hestöfl en hefðbundinn Golf GTI Clubsport er 265 hestöfl. Clubsport S er auk þess 30 kílóum léttari en hefðbundinn Clubsport og hefur auk þess akstursstillinguna “Nürburgring mode” sem aðlagar fjöðrunarkerfi bílsins að brautarakstri.

Volkswagen framleiddi aðeins 400 eintök af Golf GTI Clubsport S, 100 ætluð fyrir Þýskalandsmarkað, en til dæmis er bíllinn löngu uppseldur í Bretlandi. Það er því ekki svo auðvelt að verða sér út um eintak af bílnum.