Hættir Toyota framleiðslu Avensis?

Toyota menn liggja nú undir feldi varðandi framtíð Avensis bíls síns en bílar í þessum D-stærðarflokki eiga nú undir högg að sækja í samkeppninni við jepplinga. Því kemur til greina hjá Toyota að hætta alfarið framleiðslu hans og leggja þess í stað áherslu á framleiðslu bíls í þeim flokkum sem ganga vel, þá einna helst í flokki jepplinga.

Toyota Avensis er nú af þriðju kynslóð, sú fyrsta kom fram árið 1997 og núverandi bíll er síðan 2009, en hann hefur þó fengið heilmikla andlitslyftingu síðan þá, síðast í fyrra og er allur hinn laglegasti. Toyota Avensis á margan keppinautinn í þessum D-stærðarflokki bíla svo sem Ford Mondeo, Volkswagen Passat, Mazda6, Opel Insignia, Subaru Legacy, Honda Accord, Renault Talisman og Peugeot 406, svo einhverjir séu nefndir.

Því má að auki segja að slagurinn standi ekki síður gegn þessum bílum en ógninni frá jepplingum. Sala á Avensis er alls ekki slæm að sögn Toyota, en þar á bæ vilja menn samt horfa til framtíðar og þeirrar staðreyndar að bílar í þessum flokki eiga undir högg að sækja. Því gæti reynst arðvænlegra að leggja fremur alla krafta sína í bíla sem höfða meira til kaupenda nú.

Margur bílablaðamaðurinn furðar sig á vinsældum jepplinga umfram bíla í þessum D-stærðarflokki, ekki síst í ljósi þess að þeir eru yfirleitt með betri aksturseiginleika, meira flutningsrými í langbaksgerðum þeirra og eru yfirleitt ódýrari að auki. Það þarf samt alltaf að uppfylla óskir kaupenda og tryggja árangur í sölu og því bíður þeirra Toyota-manna erfitt verkefni.