Subaru Levorg STI í sumar

Subaru eru þekktir fyrir öfluga STI bíla sína, þá aðallega Subaru Impreza WRX STI. Nú er orðið ljóst að Subaru ætlar að bjóða Levorg bíl sinn í STI-útfærslu og hann á að koma á markað í sumar. Ekki er þó ljóst á hvaða mörkuðum þessi kraftaútfærsla bílsins verður í boði, nema að hann verður a.m.k. til sölu í heimalandinu Japan.

Subaru Levorg er til sölu á fjölmörgum mörkuðum, meðal annars hér á landi og vonandi mun þessi nýja útgáfa hans verða í boði hér og þá hjá BL. Subaru hefur ekki látið uppi hvaða vél verður í bílnum en að líkindum er það 304 hestafla vélin sem finna má í Impreza WRX STI og er hún 2,0 lítra og fjögurra strokka vél með forþjöppu.

Einnig er hugsanlegt að í honum verði að finna 328 hestafla vélina sem er í Impreza WRX S4. Að ytra útliti er þessi nýi Levorg að nokkru leiti frábrugðinni grunngerðinni af Levorg og víst er að loftfæðið um bílinn er betra með auknum vindskeiðum. Fjöðrun bílsins er breytt, bremsukerfið öflugra og hann er á sérstökum STI felgum.

Subaru Levorg STI var fyrst sýndur á bílasýningunni í Tókýó í fyrra, en þá sem tilraunabíll, en nú munu margir fagna því að hann verður framleiddur og stutt er í komu hans.