Frumsýning á nýjum Mercedes-Benz GLE og GLE Coupé

Tveir lúxusjeppar í hinni nýju GLE línu Mercedes-Benz verða frumsýndir í Bílaumboðinu Öskju laugardaginn 30. janúar kl. 12-16 Um er að ræða hina nýju GLE og GLE Coupé en mikil eftirvænting hefur ríkt eftir komu þeirra. GLE hét áður ML sem var söluhæsti jeppi Mercedes-Benz.

Nafnabreytingin er í samræmi við nýtt nafnakerfi Mercedes-Benz. GLE er fallegur lúxusjeppi og hefur breyst talsvert miðað við forverann ML. Meðal þess sem blasir við er enn laglegri fram- og aftursvipur á hinum nýja GLE sem gefur fögur fyrirheit. Innanrýmið er vandað og vel búið tækni og lúxus eins og þýski lúxusbílaframleiðandinn er þekktur fyrir. Þar er ekkert til sparað til að gera innréttinguna sem vandaðasta til að ökumaður og farþegar geti látið fara sem best um sig.

Það sem síður er sýnilegt er önnur nálgun hvað varðar útblástur og aflrásir sem setur ný viðmið í þessum flokki bíla. Yfir alla vélarlínuna fer eyðslan og CO2 losun niður um 17% að meðaltali í samanburði við fyrri gerð. Sportjeppinn er í boði með ýmsum aflmiklum vélum.

Til viðbótar við sparneytnu og aflmiklu, fjögurra strokka, 204 hestafla dísilvélina  í GLE 250 d og GLE 250 d 4MATIC, er í boði 258 hestafla, V6 dísilvél í GLE 350 d 4MATIC. Margvíslegum aðgerðum er beitt til þess að ná eldsneytisnotkuninni niður. Árangurinn er eyðsla upp á 6,4 l/100 km sem er 9% minni eldsneytisnotkun en í fyrri gerð.

GLE kemur einnig í Plug-In Hybrid útfærslu í vor en þetta er í fyrsta skipti sem Mercedes-Benz framleiðir jeppa með tengiltvinnaflrás. Aflrásin í GLE 500 e skilar 449 hestöflum og hámarkstog er 650 Nm sem tryggir mikla afkastagetu. CO2 losunin er hins vegar einungis 78 gr/km og eyðsla í blönduðum akstri aðeins 3,3 lítrar á hundraðið. Akstursdrægi tvinnbílsins er allt að 30 km einungis á raforkunni.

Nýr GLE Coupé er sterklegur ásýndum og með aðlaðandi formlínum. Þaklínan hallar að aftanverðu sem gefur honum sporlegt coupé útlit. Sportjeppinn er í boði sem 350d og þá með aflmikilli 260 hestafla díselvél. Bæði GLE og GLE Coupé bjóða upp á DYNAMIC SELECT kerfið, með fimm akstursstillingum sem gerir aksturinn enn meira spennandi og skemmtilegan. Þá eru GLE og GLE Coupé sportjepparnir búnir hinni nýju og fullkomnu 9G-TRONIC sjálfskiptingu sem og hinu háþróaða 4MATIC fjórhjóladrifi frá Mercedes-Benz.