Þúsund hestafla etanól Benz

Breytingafyrirtækið Speedriven hefur farið höndum um þennan Mercedes Benz CL 600 og gert hann að einum öflugasta götuhæfa Benz sem til er, en hann er 1.000 hestöfl.

Það er tvöföld hestaflatala þessa bíls eins og hann kom út úr verksmiðjum Mercedes Benz árið 2003. Bíllinn er með 12 strokka og 5,5 lítra vél með tveimur forþjöppum, en Speedriven setti í bílinn tvær miklu stærri Garrett forþjöppur og keflablásara, sem og nýtt pústkerfi og loftinntak, en ljóst er að með allt þetta afl gleypir hann ógnarmagn lofts.

Þessar breytingar voru nægar til að tvöfalda hestaflatöluna og svona búinn fer hann kvartmíluna á minna en 11 sekúndum. Speedriven þurfti reyndar að búa til nýjan hugbúnað vegna þeirra breytinga sem gerðar voru í vélarhúsi bílsins.

Ekki er ljóst hvað hann er snöggur uppí hundraðið, en það er miklu minna en þær 4,7 sekúndur sem frumgerð bílsins er gefinn upp fyrir, líklega ekki mikið meira en 3 sekúndur. Til þess að ná fram þessari háu hestaflatölu er bíllinn látinn brenna etanóli, en hann er einnig fær um að brenna hefðbundnu bensíni.