Mercedes Benz GL verður GLS

Mercedes Benz hefur undanfarið endurskipulagt nafnakerfið á bílalínu sinni og eru greinilega ekki hættir. Nýjasta nafnabreytingin verður sú að stóri GL-jeppinn fær S að auki og mun heita GLS.

Þessi sjö sæta jeppi fær samhliða nafnabreytingunni nokkra andlitslyftingu. Mesta útlæitsbreytingin er að framan og sver sú breyting sig í ætt við aðra nýhannaða bíla Mercedes Benz. Enn meiri breyting verður á innanrými GLS. Mercedes Benz vill meina að GLS sé eins og S-Class, þ.e. flaggskipið í jeppaflokki, en S-Class er sannarlega flaggskipið í fólksbílaflokki Benz.

Öflugasta gerð GLS verður AMG GLS63 með 577 hestafla vél, eða 27 hestöflum öflugri en núverandi AMG GL63. GLS500 4Matic verður með V8 vél með tveimur forþjöppum og 455 hestöfl, eða 20 hestöflum meira en forverinn.

Þriggja lítra dísilútgáfa bílsins verður 255 hestöfl en einnig má fá hann með 3,0 lítra bensínvél með tveimur forþjöppum og er hún 329 hestöfl. Allar þessar gerðir nýs GLS verða með 9 gíra sjálfskiptingu. Nýr GLS fer í sölu í þessum mánuði í Þýskalandi.