Milljón rafmagnsbílar og tengiltvinnbílar seldir

Það markar nokkur tímamót að nú hafa selst yfir 1 milljón rafmagns- og tengiltvinnbílar (Plug-In-Hybrid) í heiminum. Ef þeim væri öllum lagt í beinni línu næði hún frá New York til Los Angeles.

Af þessum milljón bílum eru 62% hreinræktaðir rafmagsnbílar og 38% tengiltvinnbílar. Þriðjungur þeirra allra er að finna í Bandaríkjunum, 15% þeirra í Kína og 12% í Japan. Athygli vekur að fimmti stærsti flotinn er í Noregi, en þar eru þeir líka flestir hlutfallslega ef horft er á allan bílaflota landanna. Þar má nú finna 66.000 slíka bíla.

Þessir milljón bílar eru fremir nýir og helmingur þeirra hefur verið keyptur síðastliðna 14 mánuði. Það sem meira er þá tók það helmingi styttri tíma fyrir rafmagns- og tengiltvinnbíla að ná milljón bíla markinu en Hybrid bílum tókst fyrir um áratug síðan. Hybrid bílar hlaða eingöngu hreyfiorku bíla inná rafgeyma sína en Plug-In-Hybrid bílum er stungið í samband við heimilisrafmagn.

Af þessum milljón bílum eru Nissan leaf bílar 20% þeirra og Chevrolet Volt 10%. Næst á eftir þeim koma svo Tesla Model S, Toyota Prius Plug-In-Hybrid og Mitsubishi Outlander Plug-In-Hybrid.