Nýr Mitsubishi Pajero Sport

Mitsubushi Pajero Sport seldist einkar vel hér á landi fyrir þónokkrum árum, en er ekki í boði sem stendur. Það þýðir ekki að Mitsubishi framleiði ekki bílinn og ný gerð hans var kynnt á dögunum.

Bíllinn var kynntur í Tælandi og verður hann í fyrstu seldur þar, en til stendur að selja hann í einum 90 löndum. Þar á meðal eru Ástralía, Rússland, í miðausturlöndum, Afríku, S-Ameríku og SA-Asíu, þ.e. í löndum þar sem Mitsubishi hefur þegar selt um 400.000 eintök af Pajero Sport af síðustu kynslóð.

Nýi bíllinn er með 2,4 lítra dísilvél með forþjöppu sem er 180 hestöfl. Hún er sögð 17% sparneytnari er eldri dísilvélin sem í bílnum var. Nýr Pajero Sport verður hlaðinn nýjasta öryggisbúnaði, þar á meðal sjálfvirkri hemlun og blindpunktsviðvörun. Bíllinn verður áfram mjög hæfur til torfæruaksturs og ýmis aðstoðarkerfi bílsins miðast við slíkan akstur og hann stendur auk þess fremur hátt frá vegi.

Þessi nýi bíll er ekki enn einn jepplingurinn sem byggður er eins og fólksbíll, hann á að vera fær um að fara vegleysur og þjóna vel kaupendum í þessum löndum en víða í þeim er um veglaysur að fara.

Mitsubishi er ekki eini bílaframleiðandinn sem kynnt hefur nýja torfæruhæfa jeppa eða jepplinga á þeim mörkuðum sem Pajero Sport er miðaður á. Nýlega kynnti Ford svipaða stærð á bíl, Everest sem byggður er á Ranger pallbílnum og Toyota kynnti Fortuner, sem byggður er á Hilux pallbílnum. Það eru því allir að gera það sama og ekki í fyrsta skipti sem svo er.