Citroën þarf að stórauka framleiðslu C4 Cactus

Viðtökur hins óvenjulega bíls Citroën C4 Cactus hafa komið Citroën ánægjulega á óvart og sala bílsins er langt umfram væntingar. Citroën hafði stefnt að sölu 70.000 slíkra bíla á ári, en nú stefnir hátt í 100.000 bíla sölu á bílnum í ár.

Citroën framleiðir þennan bíl eingöngu fyrir Evrópumarkað og öll þessi sala er í álfunni.  Vegna velgengni hans ætlar Citroën hinsvegar að markaðssetja bílinn víðar, meðal annars í Ástralíu, S-Afríku og suðaustur Asíu. Mun sala hans þá væntanlega aukast enn. 

Góð sala Citroën C4 Cactus hefur fært hann í þriðja sætið meðal bílgerða Citroën, á eftir C3 bílnum og C4 Picasso. Citroën vill meina að þessar góðu viðtökur C4 Cactus séu til vitnis um að bílkaupendur kunni að meta óvenjulega bíla, en það má sannarlega segja um þennan bíl.

Fólk virðist annaðhvort elska hann strax eða hata hann. Að sögn Citroën manna vilja þeir frekar fá þau viðbrögð en að vera alltaf fjórði kostur í huga bílkaupenda. Citroën C4 Cactus mun skapa fordæmi framtíðarsköpunar Citroën að sögn forsvarsmanna þess.