Toyota RAV4 slær við Honda CR-V í Bandaríkjunum

Sala jepplinga í Bandaríkjunum er gríðarmikil og var sala þeirra 22% meiri nú í ágúst en í ágúst í fyrra. Síðustu ár hefur Honda CR-V verið söluhæsti jepplingurinn vestanhafs og í fyrra seldust meira en 300.000 bílar þar af þeirri einu gerð.

Í fyrsta skipti gerðist það þó í nýliðnum ágústmánuði að Toyota RAV4 jepplingurinn seldist í fleiri eintökum en Honda CR-V. Toyota RAV4 seldist í 35.614 eintökum en 34.079 Honda CR-V bílar seldust í ágúst.

Söluhæsti bíllinn í þessum flokki ef árið allt er skoðað er engu að síður Honda CR-V og víst má telja að hann verði það til loka árs. Á árinu hafa selst 217.293 Honda CR-V en 179.345 Toyota RAV4 bílar. Af Ford Escape hafa selst 208.444 bílar en 28.996 slíkir seldust í ágúst.

Nissan Qashqai náði 4. sætinu með 21.419 selda bíla í ágúst og í því fimmta var Chevrolet Equinox, en af honum seldust 21.387 eintök. Sala þessara 5 bílgerða í heild á árinu er 909.960 bílar, eða ríflega hundrað sinnum fleiri bílar en selst hafa á Íslandi af öllum nýjum bílum það sem af er ári.  Fleiri eintök af Toyota RAV4 seldust  í Bandaríkjunum í ágúst en heildarsala nýrra bíla á Íslandi síðastliðin 6 ár.

Í næstu sætum á eftir söluhæstu 5 jepplingunum komu svo Jeep Cherokee (18.674), Subaru Forester (16.432), Mazda CX-5 (10.709), GMC Terrain (9.680) og Jeep Patriot (9.120).