Afbrýðissöm kærasta lokar bílaverksmiðju

Sá fáheyrði atburður átti sér stað í Ungverjalandi að kærasta starfsmanns í bílaverksmiðju Mercedes Benz í Ungverjalandi tilkynnti sprengjuhótun í verksmiðjunni, ekki einu sinni heldur þrisvar.

Með því vildi hún ná sér niðri á kærasta sínum, sem hana grunaði að halda framhjá sér mér öðrum starfsmanni verksmiðjunnar. Hélt hún að með aðgerðum sínum myndi hún stöðva framferði kærasta síns en erfitt er að ímynda sér samhengið þar á milli.

Í verksmiðjunni eru framleiddir 180 bílar á hverri vakt og því höfðu hótanir hennar talsverðar afleiðingar er vinna var stöðvuð í henni í þrígang. Stúlkan notaði eigin síma við hótanirnar og því reyndist auðvelt að hafa hendur í hári hennar og fékk hún þriggja ára fangelsisdóm, þó á skilorði.

Í verksmiðjunni eru framleiddar bílgerðirnar Mercedes Benz CLA og B-Class bílar og þeir sem þurfa að bíða aðeins of lengi eftir að fá nýja slíka bíla afhenta, geta líklega kennt þessari afbrýðissömu stúlku um það.