Rúgbrauð með rjóma á

Nú er gamla Rúgbrauðið frá Volkswagen hætt í framleiðslu, en það þýðir ekki að frægð þess og aðdáun fari minnkandi. Fyrir aðdáendur þess er nú mögulegt að fá sér framlengingu í sama stíl og lit.

Það eru hjón ein í Bretlandi sem hófu framleiðslu á þeim og nú er svo komið að þau eru einnig framleidd í Oregon í Bandaríkjunum og rjúka út. Þau eru ekki framleidd úr gömlum Rúgbrauðum heldur sérframleidd frá grunni.

Í þeim er vönduð innrétting í retro-stíl og flest þau þægindi sem ferðaglatt fólk óskar sér, eldavél og tvíbreitt rúm og fá má þau með upphækkuðu þaki svo þau verði manngeng. Úr verður mjög svo aðlaðandi hjólhýsi sem höfðar mjög til aðdáenda gamla Rúgbrauðsins.

Lengd þess er um 5 metrar og breiddin 180 sentimetrar. Verð þeirra er um 2,5 milljónir króna í Bandaríkjunum. Framleiðandinn í Oregon hefur reyndar selt flest þeirra útbúin sem söluvagna til allskonar matvöru og hefur vart við að sinna pöntunum.