BMW i8 tvinnbíllinn uppseldur út árið

Öll framleiðsla þessa árs á tvinnbílnum BMW i8 er þegar seld og afhending fyrstu BMW i8 bílanna hefst í júní næstkomandi. BMW i8 er sannkallaður tímamótabíll, hann eyðir aðeins 2,1 lítrum á hverja hundrað kílómetra en er samt 362 hestöfl.

Vélbúnaður hans samanstendur af 96 kílóvatta rafmótor og 231 hestafla brunavél sem er aðeins þriggja strokka og styðst við forþjöppu. Hann er aðeins 4,4 sekúndur í hundraðið. Allar þessar tölur eru með hreinum ólíkindum og að auki mengar hann aðeins 49g/km. Hámarkshraði hans er takmarkaður við 250 km/klst.

BMW i8 er fyrsti framleiðslubíll í heimi sem er með laserljósum, en aðalljós bílsins eru með lasertækni. Þau lýsa eina 600 metra en eru samt 30% sparsamari á orku en LED ljós. Þrátt fyrir að BMW i8 sé nokkuð stór bíll vegur hann aðeins 1.485 kíló.

Fyrir alla þessa dýrð þarf þó að borga vel, hann kostar 19,8 milljónir króna í heimalandinu Þýskalandi. Ársframleiðsla i8 er aðeins 1.900 bílar í ár og 5.000 bílar á næsta ári, en sala þessa árs er uppseld. Ennfremur hefur BMW borist 10.000 pantanir í minni tvinnbílinn BMW i3. Automotive News Europe greinir frá.