Jól

Sítrónur, kerti, sykur og te

"Þetta voru mjög heillandi jól og ég fékk mikið út úr þeim. Ég var að vinna með skemmtilegu fólki sem var tilbúið til að láta eitthvað gott af sér leiða þannig að við ákváðum að reyna að gera jólin svolítið sérstök fyrir sjúklingana okkar, fangana í fangelsinu. Við fórum út og keyptum sjálf te, sykur, sítrónur og kerti. Það var ekki mikið annað að hafa þarna. Svo sat ég heilan dag á gólfinu í vörugeymslunni og pakkaði þessu inn í sellófan, þó hamingjan megi vita hvar ég fékk svoleiðis í Bakú á þessum tíma því það var ekkert til. Þetta var auðvitað ekki síður fyrir mig gert en aðra því mér fannst þetta svo skemmtilegt. Svo fórum við með þetta til fanganna á okkar deildum og allir fengu sinn pakka. Það var alveg ofsalega gaman. Þegar við komum til vinnu daginn eftir sáum við að borð höfðu verið dregin fram, kveikt á kertum og gerð svolítil jólastemming, hvort sem menn voru kristinnar trúar eða einhverrar annarrar," segir Hjördís sem hefur starfað fyrir Rauða Krossinn frá árinu 1997. En hvernig skyldi Hjördís hafa eytt jólunum sjálf? "Ég bjó mér til jól. Ég hafði fengið villta fugla og lét sem þeir væru rjúpur og eldaði þá þannig. Ég kom út til Bakú í lok júlí og deildi íbúð með manni frá Líbanon sem eldaði alltaf voða góðan mat þannig að ég eldaði auðvitað aldrei. Svo hann varð heldur betur hissa þegar ég tók mig til og eldaði dýrindis jólamat því hann var sannfærður um að ég kynni ekkert að elda. Ég hef aldrei fengið eins margar jólagjafir sendar frá Íslandi og þessi jól, fékk til dæmis níu bækur frá vinum og vandamönnum. Ég saknaði fjölskyldunnar minnar en þessi jól voru samt ótrúlega jólaleg, þrátt fyrir allt." Um jólin núna verður Hjördís heima á Íslandi og í fyrsta skipti lengi getur hún tekið þátt í jólaundirbúningnum. "Mér finnst aðventan svo frábær tími og ég hlakka til að eyða henni með fjölskyldunni minni, á tónleikum, kaffihúsum og Laugaveginum. Svo á ég nýtt jólabarnabarn sem gerir þetta allt enn skemmtilegra."


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



Velkomin á Vísi. Þessi vefur notar vafrakökur. Sjá nánar.