Suarez dæmdur í tíu leikja bann

Framherji Liverpool, Luis Suarez, var í dag dæmdur í tíu leikja bann fyrir að bíta Branislav Ivanovic, varnarmann Chelsea, í leik liðanna um síðustu helgi.

Suarez mótmælti ekki ákærunni þegar hún var gefin út í gær og sagði við það tilefni að þriggja leikja bann væri næg refsing fyrir bitið. Aganefnd enska knattspyrnusambandsins var ekki sammála.

Bannið er því talsvert högg fyrir framherjann sem spilar ekki meira á þessu síðasta tímabili. Liverpool á fjóra leiki eftir af tímabilinu og Suarez verður því í banni í fyrstu sex leikjum næsta tímabils.

Suarez hefur fram á föstudag til þess að áfrýja banninu.

Þetta er í annað sinn sem Suarez fer í bann fyrir að bíta leikmann. Hann var dæmdur í sjö leikja bann í Hollandi á sínum tíma er hann beit leikmann PSV Eindhoven.

Þetta er annað langa bannið sem Suarez fær í enska boltanum en hann var dæmdur í átta leikja bann í fyrra eftir samskipti sín við Patrice Evra, leikmann Man. Utd, en Evra sakaði Suarez um að vera með kynþáttaníð í sinn garð.