Ámælisvert að þiggja tugmilljóna styrki

Varaformaður Framsóknarflokksins segir ámælisvert að Sjálfstæðisflokkurinn skyldi þiggja tugmilljóna styrki frá fyrirtækjum eftir að stjórnmálaflokkarnir höfðu náð samkomulagi um breytingar á lögum varðandi styrki til þeirra og stutt í að ný lög tækju gildi.

Framsóknarflokkurinn tilkynnti í gær að hann ætlaði ekki að birta lista yfir þau fyrirtæki sem styrktu flokkinn á árinu 2006, síðasta árinu áður en ný lög um styrki til stjórnmálaflokka tóku gildi. En upplýsti að hann hefði fengið 30,3 milljónir króna í heild frá fyrirtækjum og hæsti styrkurinn hefði verið fimm milljónir. Í dag segir varaformaður flokksins hins vegar að verið sé að vinna að því að fá samþykki fyrirtækja sem styrktu flokkinn til að birta upplýsingarnar.

„Mér finnst vera krafa um það í samfélaginu að þessi mál séu uppi á borðinu og ég er á því líka. Mér finnst hreinlegast að þetta verði birt," sagði Birkir Jón í samtali við fréttastofu.

„Ég tel að flokkurinn eigi ekki að vera fela eitt eða neitt frekar en aðrir flokkar sem hafa birt yfirlit frá árinu 2006," sagði varaformaðurinn.-

Birkir Jón vonast til að hægt verði að opinbera þessar upplýsingar innan fárra daga. Hann segir upplýsingar um styrki Landsbankans og FL Group til Sjálfstæðismanna ótrúlegri en menn hafi gert sér í hugarlund.

„Með þessu var verið að ganga á svig við það samkomulag sem náðist á milli stjórnmálaflokkanna. Við fórum í þá vegferð að setja ný lög um fjármál stjórnmálaflokkanna og það að menn skuli taka inn svona stóra styrki rétt áður en þau lög voru samþykkt er náttúrlega mjög ámælisvert."

Samkvæmt heimildum fréttastofunnar eru Landsbankinn, kaupþing, Glitnir, Actavis eignarhaldsfélag Samvinnutrygginga og fleiri meðal þeirra sem styrktu Framsóknarflokkinn, eins og reyndar flesta hina flokkana.