Orð Páls Magnússonar vekja undrun

Útvarpsstjóri virtist boða stefnubreytingu Ríkisútvarpsins í Sprengisandi á Bylgjunni í morgun og hafa orð Páls Magnússonar vakið nokkra athygli í dag. Sprottið hafa upp umræður um hvort boðuð stefna Páls samræmist gildandi lagaákvæðum um Ríkisútvarpið.

„Það má ekki hafa skírskotunina of þrönga, þetta heitir almannaþjónustuútvarp, þetta er ekki fámannaþjónustuútvarp og út á það gengur skilgreiningin á þessari starfsemi alls staðar í kringum okkur, á norðurlöndunum, Bretlandi og alls staðar sem við tökum okkur til fyrirmyndar, að það verður að vera almenn skírskotun í dagskrárgerð, en það má ekki breyta þessu í einhverja sérviskulega, þrönga dagskrá sem hefur ekki almenna skírskotun, þá er alveg eins gott að loka þessu, þá hefur þetta enga þýðingu,“ sagði Páll í dag.

Lögin um Ríkisútvarpið eru undirorpin túlkun en þó er skýrt kveðið á, í ítarlegri 3ju grein þeirra að Ríkisútvarpinu beri skilda til þess að bjóða uppá fjölbreytt og vandað menningarefni og fjalla um ólík svið menningar, lista og íþrótta á Íslandi. Jafnframt er kveðið á um tryggt sé að landsmönnum sé veitt innsýn í alþjóðamál, mismunandi menningarheima og ólík sjónarmið.

Katrín Jakobsdóttir, fyrrverandi mennta og menningarmálaráðherra ein þeirra sem velt hefur fyrir sér orðum Páls. „Þetta vekur upp spurningar um hvernig við lítum á hlutverkið því eins og það er skilgreint í lögum þá erum við að setja mjög fjölbreyttar kröfur á Ríkisútvarpið og ætlumst til að það gegni ákveðnu hlutverki. Ég held að það skipti mjög miklu að stjórn og stjórnendur RÚV velti því fyrir sér hvernig þau framfylgi því hlutverki, sem er skilgreint í lögum,“ segir Katrín.

Ingvi Hrafn Óskarsson, formaður stjórnar RÚV og lögmaður vildi ekki tjá sig efnislega um orð Páls og um hvort þau stönguðust á við lög félagsins. Hann sagði það þó skýra stefnu stjórnar að engar meiriháttar breytingar verði gerðar á áherslum Rásar 1.