Ómar týndi debetkortinu sínu

Ómar Ragnarsson kvikmyndagerðarmaður mun ekki upplýsa um árangur fjáröflunarinnar fyrr en á laugardaginn. Hann er í Veiðivötnum og verður þar út vikuna en hann hefur ekki aðgang að netbanka. Ómar hefur auk þess týnt debetkortinu sínu.



Friðrik Weisshappel veitingamaður mun á laugardaginn færa Ómari ávísun vegna söfnunar sem Friðrik réðist í til að greiða niðurskuldir Ómars. Á síðunni er gefið upp reikningsnúmer Ómars. Þetta kemur fram í tilkynningu.

Friðrik stofnaði á föstudaginn Facebook-síðu þar sem hann hvetur fólk til að gefa Ómari eitt þúsund krónur í sjötugs afmælisgjöf sem þökk fyrir ómetanleg störf í þágu íslenskrar náttúru. En um morguninn hafði Friðrik lesið viðtal við Ómar í DV þar sem hann segir frá fjárhagserfiðleikum sínum vegna gerðar heimildarmynda um náttúru Íslands og þær hættur sem að henni steðja. Skuldin nemur fimm milljónum króna.



Átakið mun svo halda áfram til sjötugsafmælisdags Ómars þann 16. september en þá verður önnur ávísun afhent.