Nýstárlegar aðferðir felldu Kragh

„Við bíðum rólegir eftir niðurstöðu Hæstaréttar Íslands," sagði Karl Steinar Valsson, yfirmaður fíkniefnadeildar lögreglunnar spurður um viðbrögð vegna þungs dóms sem Þorsteinn Kragh og Jacob Van Hinte fengu í dag.

Þeir voru dæmdir samanlagt í sextán og hálfs árs fangelsi fyrir að hafa reynt að smygla tæpum 200 kílóum af kannabis og rúmu kílói af kókaíni til landsins með Norrænu síðasta sumar.

Það er mesta magn fíkniefna sem reynt hefur verið að smygla til landsins í heilu lagi. Ein af meginástæðum þess að Þorsteinn - sem neitaði sök allan tímann - var sakfelldur, voru nýstárlegar rannsóknaraðferðir lögreglunnar.

Karl Steinar vildi ekki fagna góðum árangri strax en hnykkti þó á því að málið væri athyglisvert fyrir margar sakir. Það reyndi á nýjar aðferðir við rannsóknina en til að mynda voru sérfræðingar í upplýsinga- og áætlanadeild lögreglunnar fengnir til þess að greina notkun farsíma Þorsteins og Jacobs.

Rannsókn lögreglu beindist að miklu leyti að símanúmerum sem tengdu mennina saman. Í síma Jacobs fannst númer undir nafninu Kimmi sem er frelsisnúmer og var frekar lítið notað. Lögregla lét hinsvegar gera veigamikla rannsókn þar sem sími Þorsteins og umrædds númers voru rakin saman. Í stuttu máli var niðurstaða rannsóknarinnar að nær útilokað er talið að sitthvor aðilinn hafi átt umrædd símanúmer. Á einu ári sem rannsóknin náði yfir voru símarnir nær alltaf á sömu sendum. Þegar Jacob var handtekinn var hætt að nota umrætt númer. Sá sími hefur þó aldrei fundist.

Skýringarnar sem Þorsteinn gaf fyrir rétti voru meðal annars þær að hann væri gjarn á að taka puttalinga upp í bifreið sína en ákæruvaldinu fannst ótrúverðugt að þeir puttalingar myndu allir nota sama símanúmer. Einnig var engin notkun á símanum þegar Þorsteinn fór erlendis.

Í síma Þorsteins og umræddum síma voru einnig svipaðar talhólfskveðjur með álíkum röddum. Einnig var sama PIN númer á símunum, 6969. Þá var fylgst með Þorsteini eftir að Jacob var handtekinn. Hann fór meðal annars til Amsterdam og benti sækjandi á að Þorsteinn hefði notað símaklefa þar, þrátt fyrir að vera með a.m.k þrjá farsíma í notkun.

Símagögnin virðast styðja fyrri frásögn Jacobs þegar þau eru borin saman við þau tímabil sem þeir hittust á fundum í Amsetrdam og annað. Á árinu 2008 var leynisímanúmerið mikið notað.

Karl Steinar telur það ánægjuefni að héraðsdómur hafi tekið undir rannsóknaraðferðirnar og segir það jákvætt skref. Nú sé þó að bíða þess að Hæstiréttur Íslands taki málið fyrir. Sterklega má búast við því að dómnum verði áfrýjað sé tekið mið af yfirlýsingum Heiðrúnar Lindar Marteinsdóttur, sem tjáði sig við fjölmiðla í morgun, eftir að Þorsteinn var dæmdur.

Í dómsorði kom fram að Þorsteinn ættti engar málsbætur.