Innlent

Ný bylting á Beauty Tips: „Ég hélt áfram að kalla minn nauðgara vin“

Sunna Kristín Hilmarsdóttir skrifar
Íslenskar konur deila því nú á Beauty Tips hvernig þeim leið og hvað þær gerðu eftir að hafa verið beittar kynferðisofbeldi.
Íslenskar konur deila því nú á Beauty Tips hvernig þeim leið og hvað þær gerðu eftir að hafa verið beittar kynferðisofbeldi. vísir/getty
Ný bylting íslenskra kvenna í baráttunni gegn kynferðisofbeldi hófst í Facebook-hópnum Beauty Tips í morgun undir myllumerkinu #eftirkynferðisofbeldi. Þar deila íslenskar konur því hvernig þeim leið og hvað þær gerðu eftir að hafa verið beittar kynferðisofbeldi.

Tilgangurinn er að benda á að ekki séu til nein rétt viðbrögð við kynferðisofbeldi en Þórdís Elva Þorvaldsdóttir, rithöfundur og fyrirlesari, setti meðal annars eftirfarandi færslu í hópinn:

„Í tilefni umræðna síðustu daga langar mig að benda á að það eru ekki til nein „rétt viðbrögð“ við kynferðisofbeldi. Sumt sem maður gerir eftir á kann að virðast órökrétt, enda er ofbeldi í alla staði órökrétt upplifun. Sjálf hélt ég áfram að mæta í skólann þótt brotamaður minn væri samnemandi minn. Það afsannar ekki að hann beitti mig ofbeldi. Fordæmum ekki viðbrögð annarra, né notum þau gegn þeim. Sýnum skilning. ‪#‎eftirkynferðisofbeldi‬“

Ekki undarlegt að bregðast við á alls konar hátt

Aðspurð hvaða umræðu hún er að vísa í segir Þórdís að hún sé meðal annars að vísa í aðdróttanir þess efnis að vinsamleg samskipti brotaþola og gerenda dragi úr einhvern hátt á líkum þess að afbrot hafi átt sér stað.

 

„Nú er það bara oft þannig að brotaþolar þekkja til þeirra sem brjóta gegn þeim kynferðislega. Þá er því ekkert undarlegt að viðkomandi, sem er oftast í áfalli, bregðist við á alls konar hátt sem kannski við fyrstu sýn kann að virðast órökréttur,“ segir Þórdís.

Viðbrögðin séu hins vegar síður en svo órökrétt þegar tekið sé tillit til þess að áfallaviðbrögð eru mjög margvísleg.

Þórdís Elva Þorvaldsdóttirvísir/pjetur
Hætt verði að nota viðbrögð fólks til að grafa undan trúverðugleika þeirra

„Í netumræðunni í dag rakst ég á mjög góða samlíkingu þar sem talað var um að fólk sem hefur lifað af flugslys hefur fundist ráfandi við slysstað leitandi að sokkunum sínum. Þetta finnst fólki skiljanlegt því þarna er um að ræða manneskju í gríðarlegu áfalli sem er að gera eitthvað sem kann að virðast órökrétt. Það þýðir þó klárlega ekki að viðkomandi hafi ekki lent í slysi eða skelfilegum atburði. Það er alveg eins með önnur áföll og kynferðisofbeldi er ekkert undanskilið.“

Þórdís segir tíma til kominn að við hættum að nota viðbrögð fólks eftir kynferðisofbeldi til þess að draga úr upplifun þeirra sem verða fyrir áföllum eða grafa undan líkum þess að viðkomandi sé að segja satt.

„Ekkert til í mannlegum samskiptum sem hægt er að setja inn í formúlu“

En hvaða áhrif gæti þessi bylting haft?

„Ég bind vonir við að í þessu tilviki, sem og öðrum, að þá verði áhrifin þau að opna augu fólks að það er ekkert til í mannlegum samskiptum sem hægt er að setja í inn í formúlu eða excel-skjal, og allra síst viðbrögð í órökréttum aðstæðum. Kynferðisofbeldi er mjög órökrétt upplifun og stangast á við allt sem okkur er kennt um kynfrelsi og virðingu við náungann.“

Þórdís segir að það sé svo sannarlega þörf á vitundarvakningu sem þessari miðað við hvernig umræðan sé oft á tíðum í garð brotaþola.

„Mér leið eins og ég hefði gert eitthvað af mér“

Hér að neðan má sjá nokkur innlegg kvenna í nýju byltingunni:

Ég hélt áfram að kalla minn nauðgara vin. Fór í bíó daginn eftir með honum og fleiri vinum. Ég hlaut að hafa misskilið eitthvað svakalega og ég hefði átt að segja nei oftar og ég barðist greinilega ekki nóg á móti, jafnvel þó ég hafi endað með marbletti í hringinn um úlnliði og á fleiri stöðum. Vinir manns gera nefnilega ekki svona. Það rann ekki upp fyrir mér hvað hann gerði fyrren hann nauðgaði annari stelpu. Hvað ef ég hefði getað rökrætt við þessar ljótu tilfinningar?

#‎eftirkynferðisofbeldi‬

‪#‎daginneftir‬

‪#‎þöggun‬

‪#‎langtímaafleiðingar‬

Eftir að leigubílstjórinn hafði nauðgað mér neitaði hann að taka greiðslu fyrir bílinn. Mér leið eins og ég hefði gert eitthvað af mér. Mér leið eins og hefði þegið greiðslu fyrir kynlíf. Eg gat ekki kært hann, því þá kæmi í ljós hvað eg hefði verið ógeðsleg. ‪#‎eftirkynferðisofbeldi‬

Eftir að mér var nauðgað fór ég inn á bað og kveikti á sturtunni. Svo hugsaði ég með mér að ég ætti ekki að fara í sturtu, að maður ætti ekki að fara í sturtu eftir að hafa þolað nauðgun heldur fara beint á neyðarmóttökuna. En svo hugsaði ég að ef ég færi í sturtu, vitandi að ég ætti ekki að fara í sturtu eftir að hafa verið nauðgað, þá myndi það þýða að mér hefði ekki verið nauðgað. Svo ég fór í sturtu - til að sanna fyrir sjálfri mér að mér hefði ekki verið nauðgað. Maður bregst ekki eðlilega við í svona óeðlilegum kringumstæðum! ‪#‎eftirkynferðisofbeldi‬

Ég hringdi í vin minn grátandi.... Ákvað svo að ég ætti ekki rétt á að gráta því mér fannst þetta vera mín sök svo ég leyfði helgini að líða án þess að segja neitt & mætti svo í skólan á mánudeginum og lét sem ekkert hefði gerst... Á þriðjudeginum gat ég ekki meir & sagði frá

‪#‎eftirkynferðisofbeldi‬ ‪#‎daginneftir‬

‪#‎ekkimínsök‬


Tengdar fréttir




Fleiri fréttir

Sjá meira


×