Viðskipti innlent

Varð óvinnufær og þurfti að hætta hjá Samherja eftir rannsókn

Þorbjörn Þórðarson skrifar
Fyrrverandi fjármálastjóri Samherja, fjölskyldumaður úr Svarfaðardal, varð óvinnufær vegna kvíða og þunglyndis og glímdi við meiriháttar kulnun í starfi eftir rannsókn Seðlabankans á Samherja. Hann náði sér aldrei og þurfti að hætta hjá Samherja eftir fjórtán ára starf hjá fyrirtækinu.

Hinn 8. nóvember felldi Hæstiréttur Íslands úr gildi 15 milljóna króna stjórnvaldssekt sem Seðlabanki Íslands lagði á Samherja. Áður hafði sérstakur saksóknari tvívegis fellt niður kærur Seðlabankans í málinu. Í síðara skipti með þeim rökum að Samherji hefði gætt þess „af kostgæfni“ að skila öllum erlendum gjaldeyri til landsins. 

„Embættið telur styðja þann framburð að félagið virðist samkvæmt fyrirliggjandi gögnum hafa gætt þess á sama tíma af kostgæfni að senda heim erlendan gjaldeyri sem var endurgjald félagsins vegna sölu og vöru eða þjónustu og uppfylla þannig skilaskyldureglur hvað þann erlenda gjaldeyri varðaði,“ segir í bréfi sérstaks saksóknara til Seðlabankans frá 4. september 2015.

Þá taldi embætti skattrannsóknastjóra ekki ástæðu til aðhafast neitt vegna þriggja erinda sem beint var til embættisins vegna Samherja og að ekki væri tilefni til að hefja rannsókn á skattskilum Samherja. 

Sigursteinn Ingvarsson lét af störfum hjá Samherja árið 2016 eftir 14 ára starf. Ástæða starfslokanna var sú að hann varð óvinnufær eftir rannsókn Seðlabankans og sérstaks saksóknara en Sigursteinn var einn þeirra starfsmanna Samherja sem Seðlabankinn kærði til sérstaks saksóknara. 

„Ég fór að fá kvíðaköst og fór að hugsa að þetta myndi allt fara á versta veg og að okkur tækist ekki að sannfæra þá að við værum heiðarlegt fólk og ég fór að glíma við þunglyndi. Konan mín og Þorsteinn Már hvöttu mig til að leita mér aðstoðar hjá sálfræðingi, sem ég gerði. Þá kom í ljós, eftir fyrstu viðtölin með sálfræðingi að hann taldi að ég væri miklu dýpra sokkinn en ég gerði mér grein fyrir. Ég var orðinn hálfdofinn í vinnu og náði ekki að einbeita mér, svaf illa á nóttunni og átti mjög erfitt með að tala um þetta án þess að brotna saman. Ég fór nokkrum sinnum inn á klósett og tók köst og ég á ennþá mjög erfitt með að tala um þetta í dag,“ segir Sigursteinn. 

Segir að Seðlabankinn hafi bara verið að reyna að „finna eitthvað“

Sigursteinn fékk að lokum meðhöndlun hjá geðlækni og hefur verið á lyfjum síðan. Hann sneri aldrei aftur til starfa hjá Samherja en býr í dag á Akureyri ásamt fjölskyldu sinni þar sem hann starfar hjá bílaleigu.

Sigursteinn segir að Seðlabankinn hafi ekki komið heiðarlega fram og að Már Guðmundsson seðlabankastjóri þurfi að axla ábyrgð á mistökum í málinu.

„Ég var alveg búinn að finna fyrir því að Seðlabankinn var búinn að grafa sér svo djúpa gröf að hans eina haldreipi var bara að finna eitthvað til þess að réttlæta þessa langstærstu húsleit sem ráðist hefur verið í á Íslandi,“ segir Sigursteinn og er þar að vísa til húsleitarinnar 2012 sem var upphafið að málinu.

„Það voru mistök hjá Seðlabankanum að óska eftir þessari húsleit sem var byggð á kolröngum útreikningum. Mér finnst óeðlilegt, hvort sem það eru forstjórar fyrirtækja eða æðstu embættismenn landsins, þegar menn sýna ekki sóma sinn í því að axla ábyrgð þegar þeir gera alvarleg mistök sem hafa svona gríðarleg áhrif. Ekki aðeins fjárhagsleg heldur líka tilfinningaleg,“ segir Sigursteinn.


Tengdar fréttir

Samherji segir rangt sagt frá

Lögmaður Samherja segir rangt sem sagði í frétt RÚV að niðurfelling sérstaks saksóknara á kæru Seðlabankans hefði byggt á því að skort hefði á samþykki ráðherra á reglum bankans um gjaldeyrismál

Már upptekinn í útlöndum

Már Guðmundsson seðlabankastjóri getur ekki veitt viðtöl þar sem hann fundar nú með öðrum seðlabankastjórum á fundi Alþjóðagreiðslubankans í Basel í Sviss.

Krefst skýringa frá Seðla­bankanum vegna Sam­herja­málsins

Katrín Jakobsdóttir, forsætisráðherra, hefur sent bankaráði Seðlabankans bréf þar sem hún óskar eftir greinargerð ráðsins um mál Samherja frá þeim tíma þegar rannsókn bankans á meintum brotum á reglum um gjaldeyrismál hófst.






Fleiri fréttir

Sjá meira


×