Viðskipti erlent

Sagðir vilja frekar loka TikTok en selja

Samúel Karl Ólason skrifar
Um 170 milljónir manna nota TikTok í Bandaríkjunum. Úrskurði dómstólar ekki samfélagsmiðlafyrirtækinu í vil, er útlit fyrir að TikTok verði lokað þar í landi.
Um 170 milljónir manna nota TikTok í Bandaríkjunum. Úrskurði dómstólar ekki samfélagsmiðlafyrirtækinu í vil, er útlit fyrir að TikTok verði lokað þar í landi. AP/Michael Dwyer

Gangi lögsóknir þeirra í Bandaríkjunum ekki eftir vilja forsvarsmenn kínverska fyrirtækisins ByteDance, sem á samfélagsmiðlafyrirtækið TikTok, frekar loka miðlinum vinsæla en að selja hann. Það er vegna þess að kóðinn á bakvið samfélagsmiðillinn þykir of mikilvægur rekstri ByteDance og þeir vilja ekki að hann endi í annarra höndum.

Þetta hefur fréttaveitan Reuters eftir heimildarmönnum sínum, sem segja að notendur TikTok í Bandaríkjunum séu einungis smár hluti daglegra notenda ByteDance, eða um fimm prósent, og skapi ekki það miklar tekjur að salan borgi sig.

Mestar tekjur fyrirtækisins koma frá Kína.

Í yfirlýsingu frá ByteDance í gær segir að ekki standi til að selja TikTok. Forstjóri fyrirtækisins sagðist í gær vera vongóður um að fyrirtækið myndi vinna mál sitt fyrir bandarískum dómstólum og fella lögin úr gildi.

Joe Biden, forseti Bandaríkjanna, skrifaði nýverið undir lög sem snúast um það að verði TikTok ekki selt af kínverskum eigendum þess fyrir 19. janúar næstkomandi, verði samfélagsmiðillinn bannaður í Bandaríkjunum.

Frumvarpið flaug í gegnum báðar deildir Bandaríkjaþings með miklum stuðningi frá þingmönnum beggja flokka.

Donald Trump, fyrrverandi forseti Bandaríkjanna, reyndi árið 2020 einnig að banna TikTok með forsetatilskipun en sú tilraun var stöðvuð af dómstólum. Trump lýsti því yfir í síðasta mánuði að hann væri mótfallinn því að banna TikTok í Bandaríkjunum.

Sérfræðingar segja í samtali við Washington Post að erfitt sé að spá fyrir um hvort dómstólar muni úrskurða TikTok í vil í framtíðinni. Margt bendi þó til þess að þessi nýju lög séu gölluð á sambærilegan máta og forsetatilskipun Trumps.

Kínverjar ósáttir

Um 170 milljónir Bandaríkjamanna nota TikTok að staðaldri.

Ráðamenn í Bandaríkjunum hafa lengi haft áhyggjur af tengslum ByteDance við Kommúnistaflokk Kína og að yfirvöld þar í landi geti notað TikTok til að afla upplýsinga um Bandaríkjamenn og til þess að hafa áhrif á pólitískar skoðanir þeirra.

Forsvarsmenn TikTok hafa haldið því fram að fyrirtækið tengist yfirvöldum í Kína ekki á nokkurn hátt. Móðurfélag TikTok, ByteDance, er rekið í Kína en TikTok í Bandaríkjunum og í Singapúr.

Politico sagði frá því á dögunum að í aðdraganda atkvæðagreiðslunnar á bandaríska þinginu hafi starfsmenn sendiráðs Kína í Washington DC þrýst á bandaríska þingmenn og hvatt þá til að greiða atkvæði gegn frumvarpinu.

Kínverskir erindrekar héldu því fram á þessum fundum að TikTok væri kínverskt fyrirtæki, þó forsvarsmenn fyrirtækisins hafi ítrekað haldið því fram að svo væri ekki. Talsmaður sendiráðsins sagði við Politico að málið snerist ekki eingöngu um TikTok heldur hvort komið væri fram við kínversk fyrirtæki af sanngirni í Bandaríkjunum.

Bandarískir samfélagsmiðlar eins og X og Facebook hafa lengi verið bannaðir í Kína. TikTok er einnig bannað í Kína.

Bandaríkin Kína Samfélagsmiðlar TikTok

Tengdar fréttir

Frumvarp um bann við TikTok samþykkt

Fulltrúadeild Bandaríkjaþings samþykkti í dag með miklum meirihluta frumvarp sem þvingar kínverska eigendur samfélagsmiðilsins TikTok til að selja hann en annars á miðillinn yfir höfði sér bann í Bandaríkjunum.

TikTok-frumvarpið fer léttilega gegnum fulltrúadeildina

Yfirgnæfandi meirihluti þingmanna fulltrúadeildar Bandaríkjaþings hefur samþykkt frumvarp sem ætlað er að koma böndum á samfélagmiðilinn TikTok. Frumvarpið fer nú til öldungadeildarinnar, þar sem framtíð þess þykir óljós.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið