Sturridge meiddist einu sinni enn

Daniel Sturridge, enski landsliðsframherjinn hjá  Liverpool, meiddist enn á ný á æfingu í dag og þarf að fara í myndatöku á morgun.

Sturridge meiddist aftan í læri alveg eins og með enska landsliðinu í september en í millitíðinni hafði hann meiðst á kálfa. Hann var aðeins nýbyrjaður að æfa eftir síðustu meiðsli sín.

Sturridge skoraði 25 mörk fyrir Liverpool-liðið á síðustu leiktíð en hefur aðeins spilað þrjá leiki með Liverpool í ensku úrvalsdeildinni á leiktíðinni.

Liverpool hefur saknað Sturridge mikið í vetur enda hefur liðið aðeins náð að vinna 4 af 14 leikjum án hans.

Liverpool er nú í 11. sæti og þessar fréttir auka ekki líkurnar á því að liðið komist sér upp í baráttuna um Meistaradeildarsæti á næstunni.