Slitu samskiptum við Philae

Starfsmenn Evrópsku geimferðastofnunarinnar, ESA, hafa nú slitið samskiptum við könnunarfarið Philae sem þýtur um geiminn á halastjörnu. Farið hafði ekki verið virkt í eitt ár, en ákvörðunin var tekin til að spara orku um borð í geimfarinu Rosetta, sem er á sporbraut um halastjörnuna 67P/Churyumov-Gerasimenko.

Síðast náðist samband við Philae þann 9. júlí í fyrra. Rafhlöður farsins tæmdust og ekki gekk vel að hlaða þær aftur þar sem farið hafði lent á röngum stað og var í skugga frá sólu. Samskiptamöguleikanum hefur þó verið opinn ef ske kynni að rafhlöður Philae næðu hleðslu.

It's time for me to say goodbye. Tomorrow, the unit on @ESA_Rosetta for communication with me will be switched off forever...

— Philae Lander (@Philae2014) July 26, 2016

ESA hefur reynt að koma skilaboðum til Philae sem hefur ekki svarað þeim.

Philae er fyrsta farið sem lendir á halastjörnu og hefur þetta verkefni Evrópsku geimferðastofnunarinnar staðið yfir í rúm tólf ár. Geimfarinu Rosetta var skotið á loft 2. mars 2004.

Þar sem geimfarið Rosetta er nú mjög langt frá sólu reyndist nauðsynlegt að slökkva á samskiptabúnaði þess og Philae svo farið yrði ekki rafmagnslaust. Verkefni Rosettu lýkur í september þegar farinu verður brotlent á halastjörnunni.

Þó að verkefnið hafi ekki gengið eins og best var á kosið er ekki hægt að segja að það hafi misheppnast. Með rannsókninni vildu vísindamenn ESA reyna að varpa ljósi á marga leyndardóma. Jafnvel gæti rannsóknin svarað spurningum um uppruna vatns og jafnvel lífs á jörðinni.

Hér má sjá stuttmyndina Ambition sem framleidd var fyrir ESA um Rosettuverkefnið. Myndin var tekin upp á Íslandi.

ESA birtir reglulega myndir sem teknar eru úr Rosettu á Twitter sem sjá má hér. Hægt er að skoða þrívíddarteikningu af 67P hér á vef ESA.

AFP fréttaveitan hefur eftir Andreas Scuetz, frá Þýsku geimferðastofnuninni, DLR, að verkefnið hafi verið einstaklega heillandi og að það hafi heppnast.

Tweets by Philae2014