Síðasta tækifærið til að hafa samband við Philae mistókst

Lendingarfarið Philae mun líklega aldrei aftur komast til lífsins á yfirborði halastjörnunnar 67P eða Churyumov-Gerasimenko. Vísindamenn Evrópsku geimferðastofnunarinnar, ESA, reyndu að senda farinu skilaboð á dögunum sem virðist ekki hafa tekist. Með því er verkefni sem hefur staðið yfir í meira en áratug líklega lokið.

Philae var varpað að yfirborði halastjörnunnar úr geimfarinu Rosetta í nóvember 2014. Mistök urðu við lendinguna og skoppaði farið á yfirborði halastjörnunnar. Farið staðnæmdist svo á stað þar sem lítið var um sólarljós og fönguðu rafhlöður þess ekki nægjanlegt sólarljós til að halda starfsemi farsins gangandi. Eftir einungis 60 klukkustundir varð farið rafmagnslaust.

Farið kveikti svo á sér aftur þann 14. júní í fyrra og sendi ýmis gögn til jarðarinnar.

Lofthelgismiðstöð Þýskalands, DLR, segir að tíminn sé að renna út og að síðast hafi samband náðst við lendingarfarið þann 9. júlí í fyrra. Með hverjum degi færist halastjarnan fjær sólinni og fer hitastig á yfirborðinu sífellt lækkandi. Í lok janúar verður orðið of kalt fyrir Philae til að starfa áfram.

Þá verður halastjarnan komin í rúmlega 300 milljón kílómetra fjarlægð frá sólinni og hitinn verður lægri en -51 gráða.

Vísindamenn sendu skipanir til farsins þann 10. janúar sem var ætlað að hrista ryk af sólarrafhlöðum Philae og stilla farinu betur upp til móts við sólu. Það virðist nú ekki hafa heppnast.

What happened on Sunday after @Philae2014 flywheel activation command? #Videoupdate with @Rosetta_OSIRIS pic.twitter.com/oqtuEwFK4p

— DLR - English (@DLR_en) January 12, 2016

Philae er fyrsta geimfarið sem lendir á halastjörnu og hefur þetta verkefni Evrópsku geimferðastofnunarinnar staðið yfir í tæp tólf ár. Geimfarinu Rosetta var skotið á loft 2. mars 2004.

Sjá einnig: Ferðalag Rosettu og Philae til 67P - Tímalína og myndbönd

Þrátt fyrir að aðstæður verði ekki góðar fyrir Philae við lok janúar verður áfram kveikt á búnaðinum sem hefur verið notaður til samskipta við farið þar til í september. Mögulega gæti farið sent frekari skilaboð til jarðarinnar.

Þó að verkefnið hafi ekki gengið eins og best var á kosið er ekki hægt að segja að það hafi misheppnast. Með rannsókninni vildu vísindamenn ESA reyna að varpa ljósi á marga leyndardóma. Jafnvel gæti rannsóknin svarað spurningum um uppruna vatns og jafnvel lífs á jörðinni.

Flókin lífræn efnasambönd fundust á plánetunni. Alls fundust sextán efnasambönd úr kolefnum og nítrógeni. Þá kom í ljós að yfirbörð 67P er úr ís og þakið þunnu ryklagi.

Fundur slíkra efna á halastjörnu sem rekur rætur sínar allt til fæðingar sólkerfisins getur gefið vísindamönnum skýrari sína á uppruna efnis í alheiminum.

Samkvæmt Stjörnufræðivefnum eru halastjörnur frumstæðustu hnettir sólkerfisins og innihalda þær þau efni sem reikistjörnurnar urðu til úr fyrir um 4,6 milljörðum ára. Þá hafa þær, ólíkt reikisstjörnunum, ekki hitnað að ráði og því hafa efnin þar lítið breyst.

Hér má sjá myndir sem teknar eru af Rosetta geimfarinu af 67/P halastjörnunni. Tweets by @Rosetta_OSIRIS