Mourinho: Þetta verður engin leikhúsferð

Einn af stórleikjum tímabilsins fer fram í ensku úrvalsdeildinni á sunnudag þegar Manchester United tekur á móti Liverpool á Old Trafford.

Bæði lið hafa verið að spila frábærlega að undanförnu. United hefur ekki tapað í síðustu ellefu deildarleikjum sínum (unnið síðustu sex) og Liverpool ekki í síðustu sex.

Rauði herinn hans Jürgen Klopp er í öðru sæti deildarinnar, fimm stigum á eftir toppliði Chelsea, en rauðu djöflarnir hafa verið að klífa töfluna síðustu vikurnar eftir erfiða byrjun og eru nú í sjötta sætinu, fimm stigum á eftir Liverpool.

United vann í gær 2-0 sigur á Hull í fyrri undanúrslitaviðureign liðanna í ensku deildabikarkeppninni en Liverpool leikur gegn Southampton í kvöld í sömu keppni.

Sjá einnig: Man Utd í góðri stöðu fyrir seinni leikinn | Sjáðu mörkin

„Þetta verður engin leikhúsferð hjá stuðningsmönnum,“ sagði Mourinho um leikinn en Old Trafford, heimavöllur United, hefur oft verið kallaður „leikhús draumanna“.

„Þetta verður sérstakur leikur fyrir okkur. Ef við spilum ákafan fótbolta munu stuðningsmennirnir koma og spila með okkur. Þegar okkur mistekst þá heyrist minna í áhorfendunum,“ sagði stjórinn enn fremur.

„Það eru allir hrifnir af stórleikjum - leikmenn, þjálfarar og stuðningsmenn. Allir elska stórleiki þannig að við skulum reyna að fá stórleik á sunnudag.“

Sjá einnig: Coutinho snýr aftur gegn Southampton

United getur á sunnudag unnið sinn tíunda leik í röð í öllum keppnum en Liverpool hefur aðeins tapað tveimur deildarleikjum allt tímabilið - síðast gegn Bournemouth í byrjun desember í sjö marka leik.

Zlatan var ekki með United gegn Hull í gær vegna veikinda en Mourinho segir að Svíinn verði klár í slaginn.

„Það verður ekkert vandamál fyrir leikinn á sunnudag. Ég held að hann verði í góðu lagi þá.“