Coutinho snýr aftur gegn Southampton

Philippe Coutinho snýr aftur í lið Liverpool þegar það mætir Southampton í fyrri leiknum í undanúrslitum enska deildarbikarsins á miðvikudagskvöldið.

Coutinho hefur ekkert leikið með Liverpool frá því í 2-0 sigri á Sunderland 29. nóvember. Hann meiddist á ökkla í leiknum og þau hafa meiðsli hafa haldið honum frá keppni.

Coutinho byrjaði aftur að æfa á laugardaginn og Klopp hefur staðfest að Brasilíumaðurinn muni koma við sögu gegn Southampton.

Coutinho var búinn að spila frábærlega með Liverpool áður en hann meiddist. Hann skoraði sex mörk og gaf fimm stoðsendingar í 14 deildarleikjum fyrir meiðslin.

Klopp greindi einnig frá því að James Milner og Jordan Henderson væru á batavegi og það styttist í að þeir yrðu leikfærir.