Kona grýtt til dauða í nýju myndbandi IS

Hryðjuverkasamtökin Íslamskt ríki (IS) hafa sent frá sér myndband sem virðist sýna gamlan sýrlenskan mann grýta dóttur sína til dauða fyrir meint framhjáhald.

BBC greinir frá. Ekki hefur verið staðfest að myndbandið sé ekta en IS birti það á netinu í dag. Í því sést skeggjaður maður í herklæðnaði útskýra fyrir ungri konu að verið sé að refsa henni fyrir að halda fram hjá. Hann fellir yfir henni dóm í návist eldri manns, sem talinn er vera faðir hennar. Konan biður um miskunn en er samt sem áður bundin og dregin í skurð þar sem hópur manna, þar á meðal faðir hennar, grýta hana.

Liðsmenn IS hafa reglulega deilt myndböndum á netinu sem sýna aftökur fyrir hin og þessi brot á túlkun samtakanna á Sjaría-lögum. Meðal annars hafa handsamaðir hermenn og erlendir blaðamenn verið teknir af lífi á þennan hátt.