Erlent

ISIS-liðar ekki af baki dottnir

Samúel Karl Ólason skrifar
Frá þjálfunarbúðum sem ISIS-liðar reistu í Írak.
Frá þjálfunarbúðum sem ISIS-liðar reistu í Írak.

Sérfræðingar Varnarmálaráðuneytis Bandaríkjanna hafa áhyggjur af því að ekki sé búið að sigra vígamenn Íslamska ríkisins. Þeir séu einungis í felum, hafi enn aðgang að fjármögnun og að bíði eftir að Bandaríkin fari frá Sýrlandi. Þrátt fyrir að kalífadæmi hryðjuverkasamtakanna heyri nú sögunni til búi samtökin enn yfir stórum hópi reyndra og agaðra vígamanna og án hernaðarlegs þrýstings gætu samtökin risið á nýjan leik á einungis sex til tólf mánuðum.

Þetta kemur fram í nýrri skýrslu innri endurskoðanda Varnarmálaráðuneytisins sem birt var í gær. Skýrslan snýr að miklu leyti að ákvörðun Donald Trump, forseta Bandaríkjanna, að kalla bandarískt herlið heim frá Sýrlandi. Trump tilkynnti ákvörðun sína í desember og var hún tekin gegn ráðum þáverandi varnarmálaráðherra hans, Jim Mattis, sem sagði af sér í kjölfarið.

Sjá einnig: Mattis hættir sem varnarmálaráðherra

Þá tilkynnti Trump einnig að búið væri að sigra Íslamska ríkið, án þess þó að hafa rétt fyrir sér. Sameinuðu þjóðirnar og Bandaríkjamenn áætluðu í sumar að ISIS-liðar væru allt að 30 þúsund talsins í Írak og Sýrlandi. Þá má einnig finna systursamtök Íslamska ríkisins víða um heiminn og áætlað er að um fimmtíu erlendir vígamenn gangi enn til liðs við samtökin í hverjum mánuði.

Einungis 400 til 600 ferkílómetrar af Kalífadæminu eru enn í höndum ISIS-liða en nú segir bandaríski herinn að um tvö þúsund vígamenn haldi enn til í Sýrlandi.

Þrátt fyrir það er talið að margir vígamenn hafi farið í felur. Abu Bakr al Baghdadi, leiðtogi ISIS, hefur ekki verið gómaður og margir aðrir æðstu meðlimir ISIS leika lausum hala. Sérfræðingar hafa lengi séð merki um að samtökin hafi farið aftur í skuggana og undirbúi hefðbundinn skæruhernað og hryðjuverkaárásir í stað þess að reyna að halda yfirráðasvæði.

Þessi þróun er þegar hafin í Írak samkvæmt skýrslunni, þar sem ISIS-liðar gera árásir og fremja morð í dreifðri byggðum landsins þar sem styrkur þeirra er enn mikill. Samtökin hafa aðgang að miklum tekjustofnum í Írak, samkvæmt skýrslunni, og öryggissveitir landsins eru ekki í stakk búnar til að berjast gegn þeim.

Tekist hefur að auka öryggi í borgum Írak og hefur mannfall almennra borgara undanfarna mánuði ekki verið minna síðan í nóvember 2012. Það hefur þó reynst erfitt að eiga við ISIS-liða í dreifðum byggðum Írak, þar sem meirihluta íbúa eru súnnítar.

Þá segir her Bandaríkjanna að öryggissveitir Írak reiði sig mikið á stuðning Bandaríkjamanna, sérstaklega þegar komi að upplýsingaöflun, loftárásum, þjálfun og skipulagningu. Þá segir einnig að leiðtogar öryggissveita Írak séu ekki vel að sér komnir í taktík og eigi erfitt með að halda utan um „grundvallar aðgerðir fótgönguliða“.

Þar að auki hafi mikil spilling komið niður á baráttunni gegn ISIS í Írak.

Sjá einnig: Mennirnir sem enginn vill fá heim

Svipuð staða er í Sýrlandi þar sem Bandaríkin hafa stutt við bakið á regnhlífarsamtökunum Syrian Democratic Forces eða SDF gegn Íslamska ríkinu. SDF inniheldur að mestu sýrlenska Kúrda (YPG) og araba frá norðausturhluta landsins. Varnarmálaráðuneytið telur víst að SDF geti ekki framkvæmt umfangsmiklar aðgerðir gegn Íslamska ríkinu án stuðnings herafla Bandaríkjanna.

<

Tengdar fréttir

Hótar að leggja efnahag Tyrklands í rúst

Donald Trump Bandaríkjaforseti hótar því að leggja efnahag Tyrklands í rúst, ráðist þeir gegn Kúrdum í Sýrlandi, eftir að Bandaríkjamenn draga herlið sitt til baka þar í landi eins og Trump hefur boðað.

Bað Erdogan um að koma vel fram við Kúrda

Donald Trump, forseti Bandaríkjanna, bað Recep Tayyip Erdogan, forseta Tyrklands, um að ráðast ekki á sýrlenska Kúrda eftir að bandarískir hermenn fara frá Sýrlandi.

Pompeo bjartsýnn á að hægt verði að tryggja öryggi Kúrda

Opinber heimsókn Pompeo er liður í ferðalagi hans um Miðausturlönd. Heimsóknum utanríkisráðherrans er ætlað að hughreysta bandamenn á svæðinu eftir að Bandaríkjaforseti tilkynnti skyndilega í síðasta mánuði að hann hygðist draga herlið sitt frá Sýralandi.

Telja að ákvörðun Trump muni efla ISIS

Forsvarsmenn samtaka Kúrda sem barist hafa gegn hryðjuverkasamtökunum ISIS í Sýrlandi telja að ákvörðun Donald Trump Bandaríkjaforseta, um að kalla alla hermenn Bandaríkjanna frá Sýrlandi heim, muni leiða til tómarúms sem geri það að verkum að ISIS geti safnað fyrri kröftum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.