Innlent

Stuðningsmaður Báru kallaði lögmann Miðflokksmanna fífl

Birgir Olgeirsson skrifar
Báru var ákaft fagnað þegar hún kom úr dómsal.
Báru var ákaft fagnað þegar hún kom úr dómsal. Vísir/Vilhelm
Fjölmargir mættu til að sýna Báru Halldórsdóttur stuðning í Héraðsdómi Reykjavíkur í dag. Þangað var hún boðuð vegna kröfu fjögurra þingmanna Miðflokksins um að hún gæfi skýrslu til að varpa ljósi á hvernig hún tók samtal þeirra upp á Klaustur-bar 20. nóvember síðastliðinn.

Nokkrir nafntogaðir einstaklingar voru mættir í dómsal til að sýna Báru stuðning. Þar á meðal Jón Gnarr fyrrverandi borgarstjóri, Mörður Árnason fyrrverandi þingmaður, Freyja Haraldsdóttir fyrrverandi varaþingmaður og tónlistarmaðurinn Hörður Torfason.

Þingfesting málsins fór fram í dómsal 101 sem er stærsti salur Héraðsdóms Reykjavíkur. Setið var í hverju sæti og komast færri að en vildu. Þeir sem komust þó ekki inn í salinn biðu eftir að þingfestingunni væri lokið og hylltu Báru þegar hún kom út úr þingsalnum.

Bára hafnaði kröfunni um skýrslutöku og fór fram munnlegur málflutningur þar sem sóknaraðili og varnaraðili færðu rök fyrir sínu máli.

Þingmennirnir fjórir eru Sigmundur Davíð Gunnlaugsson, Gunnar Bragi Sveinsson, Anna Kolbrún Ólafsdóttir og Bergþór Ólason.

Jón Gnarr fagnar báru fyrir þingfestinguna. Vísir/Vilhelm
Lögmaður þeirra er Reimar Pétursson en hann sagði að með athæfi sínu hefði Bára brotið gegn rétti þingmannanna til einkalífs.

Sagði hann það afar sérkennilegt að Bára neitaði að gefa skýrslu fyrir dómi og sagði það benda til þess að hún hefði eitthvað að fela.

Einhverjir sem sátu í dómsal hlógu á meðan Reimar flutti mál sitt og sumir ræsktu sig hressilega yfir fullyrðingum hans.

Á einum tímapunkti þegar Reimar flutti mál sitt hrópaði ein stuðningskona Báru að Reimari: „Fífl!“

Bára á leið úr þingsal ásamt verjanda sínum.Vísir/Vilhelm
Var konunni bent á af öðru fólki í dómsalnum að óþarfi væri að hafa uppi slíkt orðfæri en henni virtist standa á sama og endurtók orðið „fífl“ þegar Reimar gekk í sæti sitt.

Verjandi Báru, Auður Tinna Aðalbjarnardóttir, sagði að Bára hefði þegar stigið fram í blaðaviðtölum og greint frá sinni aðkomu að málinu. Því væru forsendur vitnamáls fyrir dómi brostnar og þess vegna bæri að hafna þessari kröfu.

Freyja Haraldsdóttir ásamt Báru í dómsal.Vísir/Vilhelm
Reimar sagði að ekki væri hægt að vísa í blaðaviðtal máli sínu til stuðnings. Bein sönnunarfærsla færi fram fyrir dómara og þegar blaðaviðtöl eiga sér stað þá fengju aðilar ekki færi á að spyrja gagnspurninga þar sem Bára yrði að svara fyrir dómara þar sem meiri ábyrgð fylgdi svörum hennar.

Reimar vildi einnig fá aðgang að myndefni frá Alþingi og Dómkirkjunni sem og inni á Klaustur-bar til að varpa ljósi á hvernig Bára stóð að þessari upptöku og hvort hún hefði verið ein að verki. Sagði Reimar að umbjóðendur hans drægju frásögn hennar í blaðaviðtölum í efa.

Þegar lögmennirnir höfðu lokið máli sínu sagði dómari að málið yrði tekið til úrskurðar og búast mætti við niðurstöðu undir lok vikunnar, en það gæti þó dregist.


Tengdar fréttir




Fleiri fréttir

Sjá meira


×