Innlent

Pia Kjærsgaard ekki móðguð en skýtur á Samfylkinguna

Heimir Már Pétursson skrifar
Pia Kjærsgaard forseti danska þingsins segist ekki persónulega móðguð vegna framkomu Pírata og þingmanns Samfylkingarinnar í hennar garð á Þingvöllum í gær enda ýmsu vön eftir 35 ár í stjórnmálum. Forseti Alþingis segir gagnrýni á elítulegt yfirbragð fundarins ómaklega.

Þingflokkur Pírata ákvað á síðustu stundu í gær að taka ekki þátt í hátíðarfundi Alþingis á Þingvöllum vegna nærveru Piu Kjærsgaard forseta danska þingsins og eins stofnenda Danska þjóðarflokksins, sem hefur stranga stefnu í málefnum innflytjenda og flóttafólks. Logi Einarsson formaður Samfylkingarinnar kom skilaboðum til Kjærsgaard til skila í ræðu sinni á dönsku og Helga Vala Helgadóttir þingmaður flokksins gekk af fundi undir ræðu hennar.

Kjærsgaard segist ekki hafa móðgast persónulega vegna þessa.

„Nei það þarf meira til að móðga mig. Ég hef verið í stjórnmálum í þrjátíu og fimm ár og er því ýmsu vön,“ segir danski þingforsetinn. Aðgerðir þingmannanna hafi í raun snúið að Danmörku en ekki henni og það sé þeirra vandamál.

En ertu undrandi á að þau stjórnmál sem þú stendur fyrir varðandi innflytjendur og flóttafólk njóti ekki vinsælda hjá mörgum á Íslandi?

„Það kemur málinu ekkert við. Ég er ekki hér sem þingmaður Danska þjóðarflokksins. Ég er hér sem forseti danska þingsins. En ef menn vilja endilega ræða þessi mál gæti verið að sósíaldemókratar á Íslandi ættu að kynna sér stefnu systurflokka víða um Evrópu og einnig í Danmörku,“ segir Pía og bætir glettnislega við:

„En ég held að þetta hafi meira verið keppni á milli Pírata og sósíaldemókrata um athygli fjölmiðla. Sem þeir fengu en á leiðinlegan hátt.“

Og þú þekkir það úr dönskum stjórnmálum?

„Ó já, það geri ég,“ segir Kjærgaard.

Pia ásamt forstahjónum Íslands, þeim Guðna og Elizu Reed.
Steingrímur segist ekki vera elíta

Steingrímur J. Sigfússon forseti Alþingis segir að það hafi legið fyrir lengi að forseti danska þingsins yrði á hátíðarfundinum á Þingvöllum í gær. Það hafi verið íslenska þingið og danska þingið sem sömdu um fullveldi Íslendinga og því sjálfsagt og eðlilegt að bjóða forseta danska þingsins til hátíðarfundarins.

Fyrst hafi verið rætt um komu Kjærsgaard í forsætisnefnd í ágúst í fyrra, oft rætt síðan og tilkynnt á vef Alþingis í apríl. En ákveðið var með ályktun Alþingis árið 2015 að halda fund sem þennan.

„Og mér finnst langt gengið þegar í hlut á Danmörk okkar vina- og bræðraþjóð á hinum Norðurlöndunum að við setjum okkur þá á svo háan hest að við getum ekki átt eðlileg samskipti við þá manneskju sem danska þingið hefur kosið sér sem forseta,“ segir Steingrímur.

En fundurinn á Þingvöllum hefur einnig verið gagnrýndur af mörgum á samfélagsmiðlum fyrir elítulegt yfirbragð. Steingrímur segir það ómaklega og ósanngjarna gagnrýni. Allir hafi verið velkomnir á Þingvöll og tryggt að þjóðin gæti fylgst með vandaðri sjónvarpsútsendingu frá fundinum sem hafi verið einn af um 300 viðburðum vegna afmælisársins víðs vegar um landið.

„Er það virkilega þannig nálgun sem við viljum? Að þú sért orðinn elíta ef þú ert kosinn á þing eða kosinn í sveitarstjórn þótt þú komir beint úr slorinu. Ég hafna þessari uppsetningu. Ég er engin elíta. Ég er bara bóndasonur að norðan. Alinn upp á venjulegu sveitaheimili,“ segir Steingrímur J. Sigfússon.


Tengdar fréttir

Pia í skýjunum með Íslandsferðina

Pia Kjærsgaard, forseti danska þingsins, segist vera stolt að hafa fengið að taka þátt í hátíðarþingfundinum, sem haldinn var á Þingvöllum í gær í tilefni 100 ára afmælis fullveldis Íslendinga.

Pia segir gagnrýni þingmanna fáránlega og til skammar

Þetta kemur fram í frétt á vef danska miðilsins TV2 þar sem rætt er við Piu og Helgu Völu Helgadóttur, þingmanns Samfylkingarinnar, sem gekk af hátíðarfundinum þegar sú fyrrnefnda tók til máls.

Þingmaður Pírata birtir fyrirspurn til forseta Alþingis

Jón Þór Ólafsson, þingmaður Pírata, krefur Steingrín J. Sigfússon, forseta Alþingis, svara vegna ræðu sem umdeildur stjórnmálamaður, Pia Kjærsgaard, var fengin til að halda á hátíðarþingfundi vegna hundrað ára afmælis fullveldis Íslands.




Fleiri fréttir

Sjá meira


×