Erlent

Allt gekk eins og í sögu hjá SpaceX

Samúel Karl Ólason skrifar
Stjörnumaður SpaceX á leið sinni til mars.
Stjörnumaður SpaceX á leið sinni til mars.

Allt gekk að óskum hjá fyrirtækinu SpaceX þegar fyrstu Falcon Heavy eldflauginni var skotið á loft í kvöld. Stjörnumaðurinn svokallaði situr nú við stýrið á rauðum Tesla Roadster og er á leið til plánetunnar mars.

Þegar þetta er skrifað höfðu tvær af þremur eldflaugunum sem mynda Falcon Heavy lent aftur á jörðu niðri en samband slitnaði við drónaskipið Of Course I Still Love You, þar sem þriðja eldflaugin átti að lenda. Verið er að bíða eftir staðfestingu á því hvort hún hafi lent á skipinu í heilu lagi.

Viðbót 12:05. Þriðja eldflaugin hafði ekki nægilegt eldsneyti til að lenda eins og til stóð og Elon Musk sagði á blaðamannafundi um miðnætti að hún hefði lent í sjónum á um 300 kílómetra hraða. Hins vegar stóð aldrei til að nota hana aftur. Stjörnumaðurinn er enn á braut um jörðu og stendur til að senda hann í átt að mars í nótt.

Þessi frétt hefur verið uppfærð eftir geimskotið. Upprunalegu útgáfu hennar má sjá hér að neðan. Þar geta þeir sem misstu af geimskotinu einnig horft á það aftur.

Það er komið að stóru stundinni hjá starfsmönnum fyrirtækisins SpaceX. Fyrstu Falcon Heavy eldflauginni verður skotið á loft í dag en hún er mun kraftmeiri en aðrar eldflaugar sem notast er við í dag og getur borið allt að 64 tonn á braut um jörðu.

Til stóð að skjóta eldflauginni á loft klukkan 18:30 en því var frestað til 19:20 vegna vinda. Skotinu hefur svo verið frestað á ný og nú til 20:45.

Auk þess að bera farm getur eldflaugin einnig borið Dragon geimfarið sem einnig er hannað af SpaceX. Til stendur að nota það geimfar til að flytja menn til Mars og Falcon Heavy gæti komið því af stað.

Sjá einnig: Stefnir að því að senda menn til Mars árið 2024

Falcon Heavy er 70 metra há og í rauninni er fyrsta stig hennar gert úr þremur Falcon 9 eldflaugum, sem SpaceX hefur notast við að undanförnu með góðum árangri. Skömmu eftir flugtak er hægt á miðjueldflauginni en hún heldur fluginu áfram þegar hinar tvær hafa losnað frá og eru aftur á leið til jarðarinnar.

Eftir að annað stig eldflaugarinnar tekur við snýr miðjuflaugin einnig aftur til jarðarinnar. Annað stig er knúið áfram af Merlin eldflaug SpaceX, sem er í raun Falcon 9 eldflaug fyrir utan það að hún er hönnuð til að virka vel í tómarúmi geimsins.

Tveimur af þremur Falcon 9 eldflaugunum sem mynda Falcon Heavy hefur áður verið skotið út í geim. Báðum var skotið á loft árið 2016 og lentu þær aftur á jörðinni. Það verður reynt aftur og er þeim ætlað að lenda á landi. Þriðju flauginni er ætlað að lenda á drónaskipinu Of Course I Still Love You sem verður skammt frá ströndum Flórída.

Til stóð að skjóta flauginni á loft frá palli 39A í Kennedy-geimmiðstöðinni í Flórída í dag. Nánar tiltekið var stefnt á geimskot klukkan 18:30 að íslenskum tíma. Því hefur verið frestað til 19:20.

Hægt verður að horfa á geimskotið í beinni útsendingu hér að neðan. Útsendingin hefst um tuttugu mínútum fyrir áætlaða brottför Falcon Heavy.

Í stað þess að skjóta steypu eða stáli út í geim, eins og gengur og gerist í tilraunaskotum sem þessum, ætlar SpaceX að skjóta rauðum Tesla Roadster sem Elon Musk, stofnandi og framkvæmdastjóri SpaceX, á. Starfsmönnum fyrirtækisins fannst við hæfi að senda eitthvað með tilfinningalegt gildi út í geim.

Bílnum er ætlað að fara á sporbraut um sólina þar sem hann kemur reglulega nærri jörðinni og mars.

Við stýri bílsins situr er búið að koma fyrir tómum geimbúningi eins og sjá má á Instagramsíðu Elon Musk. Þá hefur komið fram að á leið sinni út í geim mun bíllinn spila lagið Space Oddity eftir David Bowie.

Þremur myndavélum hefur einnig verið komið fyrir á bílnum og sagði Musk í gær að hann reiknaði með því að bíllinn myndi halda sporbraut sinni í hundruð milljónir ára. Jafnvel í milljarð ára.

 
Starman in Red Roadster
A post shared by Elon Musk (@elonmusk) on

Árangur alls ekki tryggður
Eins og áður segir, þá opnast skotgluggi SpaceX klukkan 18:30 í dag. Hér að neðan má sjá beina útsendingu frá geimskotinu. Auðvitað er um tilraunaskot að ræða og ekki er víst að geimskotið muni heppnast, þrátt fyrir góðan árangur SpaceX að undanförnu.

Sjálfur sagði Musk við blaðamenn í gær að hann teldi tilraunaskotið heppnast ef eldflaugin kemst af skotpallinum og „sprengi hann ekki í tætlur“. Hann sagði eldsneytið í flaugunum þremur samsvara tæplega tveimur milljónum tonna af TNT og það yrði ekki mikið eftir af skotpallinum.

Að endurbyggja pallinn gæti tekið allt að ár. Hins vegar gæti SpaceX byggt nýja Falcon Heavy á þremur til fjórum mánuðum.

„Ef þetta misheppnast, þá misheppnast þetta vonandi langt inn í verkefnið svo við lærum eins mikið og við getum.“

SpaceX sagði fyrr í dag að veðrið væri mjög hentugt fyrir skotgluggann..

Útsendingin - Geimskotið hefst eftir 29 mínútur og 30 sekúndur

Í frétt BBC er bent á að vel heppnað geimskot Falcon Heavy gæti leitt til vandræða í Geimferðastofnun Bandaríkjanna, NASA. Þar er verið að vinna að nýrri gerð stórrar eldflaugar sem ber nafnið Space Launch System.

Sú þróunarvinna hefur þegar kostað mikla peninga en það sem meira er þá mun hvert skot SLS kosta um milljarð dala á meðan hvert skot Falcon Heavy gæti kostað um 90 milljónir.

Þegar hafa spurningar vaknað upp um það hvernig Bandaríkjaþing getur réttlætt notkun SLS þegar svo ódýr valkostur er að líta dagsins ljós.


Tengdar fréttir

Elon Musk áformar engin uppvakningaragnarök

Einn ríkasti maður heims lætur rafbílaveldi sitt og áform um að byggja upp samfélag á Mars ekki duga sér. Í vikunni seldi hann almenningi eldvörpur fyrir milljarð króna. Óvíst er hvort um grín sé að ræða eða hvort einhver ástæða liggi að baki nýjasta ævintýri Elons Musk.

Öflugasta eldflaug heimsins prófuð

Falcon Heavy mun geta flutt 54 tonn á sporbraut um jörðu og meirihluti eldflaugarinnar er hannaður til þess að lenda aftur á jörðinni og vera notaður aftur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.