Coutinho ekki meira með á árinu 2016

Jürgen Klopp, knattspyrnustjóri Liverpool, hefur staðfest að Philippe Coutinho muni ekki spila meira á þessu ári.

Coutinho meiddist á ökkla í leik Liverpool og Sunderland á Anfield á laugardaginn og þurfti að yfirgefa völlinn í fyrri hálfleik.

„Það eru nokkrar vikur þangað til Phil getur spilað aftur með okkur,“ sagði Klopp sem staðfesti að Coutinho myndi ekki snúa aftur á völlinn fyrr en á nýja árinu.

Coutinho hefur verið einn allra besti leikmaður ensku úrvalsdeildarinnar á tímabilinu en þessi skemmtilegi Brasilíumaður hefur skorað fimm mörk og gefið fimm stoðsendingar í 13 deildarleikjum.

Liverpool er í 2. sæti deildarinnar með 30 stig, einu stigi á eftir toppliði Chelsea.