Slapp á ótrúlegan hátt og ætlar að helga líf sitt guði

Sigurður Smári Fossdal, 26 ára Reykvíkingur sem lenti í alvarlegu bílslysi þegar bíll hans valt ofan í Laxá í Ásum nærri Blönduós í mars 2012, fann guð. Þetta kom fram í þættinum Neyðarlínunni á Stöð 2 í gærkvöldi.

Feðgarnir Kári Kárason og Pétur Arnar Kárason komu Sigurði Smára til bjargar. Komu þeir akandi eftir þjóðveginum þegar þeir sáu bíl taka snögga beygju og hafna úti í ánni. Kári hringdi um leið í Neyðarlínuna og unnu þeir feðgar svo að því að bjarga Sigurði Smára úr vatninu.

„Á þeim tímapunkti sem bíllinn fer af stað og útaf þá er ég í einhverju þyngdarleysi, bíllinn er í lofti. Það er eins og það líði langur tími. Á meðan heyri ég rödd segja við mig: Sigurður, þú ert ekki að fara að deyja,“ rifjaði Sigurður Smári upp í þættinum í gærkvöldi.

Sigurður Smári segir að um leið hafi hann sannfærst. Þetta yrði ekki hans dauðastund.

„Það er kannski ótrúlegt að vera fastur í bíl á hvolfi ofan í á, vera að drukkna en samt klár á því að ég myndi lifa þetta af,“ segir Sigurður. „Ég heyrði í guði.“

Síðan hefur mikið vatn runnið til sjávar. Sigurður Smári hefur ákveðið að helga líf sitt guði.

„Ég starfa sem leiðtogi hjá United Reykjavík sem er kristin grasrótarhreyfing. Ég er á leiðinni í biblíuskóla í Kanada og ætla síðan í guðfræði í Háskólanum.“

Sigurður Smári hugsar með þakklæti til slyssins. Ef ekki væri fyrir þennan dag, þetta slys sem ég lenti í, þá hefði líf mitt ekki breyst svona. Hann segir fjölskylduna styðja sig í því sem hann sé að gera.

„Þau hafa samt sagt mér það að þau séu kannski alveg ekki með jafnsterkar skoðanir á þessum hlutum og ég en þau hafa séð að þetta hefur breytt mér og breytt mér til þess betra. Það er það sem þau sjá og það sem þauð styðja. Ég veit að þau styðja mig alla leið.“